د هېواد د لوېدیځې حوزې د صادروونکو ټولنې رییس سلاموطندار ته وايي چې د تېرو کلونو په پرتله سږکال د تولیدي توکو د صادراتو په کچه کې ۴۰سلنه زیاتوالی راغلی او دوی توانېدلي چې د څه باندې ۲۰۰ میلیونو ډالرو په ارزښت بهر ته صادرات وکړي.
نوموړی زیاتوي چې په صادرونکو توکو کې د پستې مغز، د هندواڼې تخم، ګنجد، ممیز، کیشته او نور توکي شامل دي.
د هرات د ګمرک رییس مهاجر فراهي وايي چې د اسلامي امارت په راتلو سره د هېواد د لوېدیځې حوزې په ګمرکونو کې د فساد ټغر ټول شوی او اوس هره ورځ شاوخوا ۵۰ باروړونکي موټر له هېوده بهر صادرات لېږدوي.
په ورته مهال د هرات د صنعت او سوداګرۍ رییس محمدزبیر دینپرور وايي چې دوی د سوداګرو د ستونزو هواري او د صادراتو زیاتوالي په موخه ګټور پلانونه پلي کړي او هڅه کوي چې د هرات هوايي دهلیز له لارې د صادراتو کچه لوړه کړي.
د سلاموطندار پښتو فېسبوکپاڼه وڅارئ
د هرات محلي مسوولان وايي، د هرات په ګمرکونو کې د مافیا شتون او د مخکیني حکومت له لوړوپوړو چارواکو سره د مافیا اړیکې د دې لامل شوې وې چې په دغه ولایت کې د صادراتو او اقتصادي چارو فعالیتونه له ستونزو او ګڼو ننګونو سره مخ شي.
