د تخار د کوکچې سیند غاړو ته د پرتو ولسوالیو اوسېدونکي وايي، د لارو خرابوالي له امله هرکال لسګونه ناروغان روغتون ته تر رسېدو مخکې د لارو په اوږدو کې خپل ژوند له لاسه ورکوي.
تخار کې د کوکچې سیند غاړو ته د پرتو ولسوالیو اوسېدونکي وايي، له تېرو څو کلونو راهیسې د مرکز تالقان ښار او د دغو ولسوالیو ترمنځ مواصلاتي لارې خرابې دي چې د خلکو ژوند یې اغېزمن کړی دی.
د یادو ولسوالیو اوسېدونکو سلاموطندار ته وویل چې د لارو خرابوالي له کبله یې هرکال ګڼشمېر ناروغان د تخار ولایتي روغتون ته تر رسېدو مخکې د لارو په اوږدو کې خپل ژوند له لاسه ورکوي.
د تخار اوسېدونکي: عبدالکریم وویل: «هغه ناروغان چې د ماورای کوکچې ولسوالیو څخه مرکزي روغتون ته لېږدول کېږي، د لارو د خرابوالي له امله هر کال له ۳۰ تر ۵۰سلنه ناروغان روغتون ته د لېږد پرمهال لارو کې خپله ساه ورکوي.»
د یادې سیمې یو بل اوسېدونکی عزیزالله ناصري بیا د اسلامي امارت له چارواکو غواړي چې د یاد سړک د رغولو چارې پیل کړي، څو پر اوسني حکومت د خلکو باور زیات شي. د نوموړي په وینا: «د سړک کار باید پیل کړي، څو پر حکومت د خلکو اعتماد زیات او سیمه کې د ابادۍ لامل شي.»
په اړه یې د تخار دوو اوسېدونکو عبدالکریم او عزیزالله ناصري سلاموطندار ته وویل:
په ورته وخت کې د تخار د ټولګټو ریاست مسوولان وايي، روان کال به دغه ولایت کې د شپږو نا بشپړو شویو پروژو چارې پیل شي.
د تخار د ټولګټو رییس امیرخان حُذیفه وویل: «ماورای کوکچه څلور سترې پروژې لري چې د جمهوریت پرمهال د څلور میلیارډ افغانیو په ارزښت څلورو شرکتونو ته ورکړل شوې وې چې هر شرکت له ۲۰ تر ۳۰ سلنه کار کړی. خو له تحولاتو وروسته همداسې پاتي. د دې پروژو تمویلونکی نړیوال بانک دی چې کارونه یې افغانستان کې درېدلې دي.»
سلاموطندار پر ټویټر هم وڅارئ
تخار کې د کوکچې سیند غاړو ته د پرتو ۷ ولسوالیو اوسېدونکي د دغه ولایت نمايي نفوس جوړوي چې له جمهوریت دورې څخه تراوسه، معیاري مواصلاتي لارو او روغتیايي خدمتونو ته د نهلاسرسي څخه شکایت کوي.
