د هلمند د والي ویاند عمر ځواک وايي، طالبانو د هلمند ـ کندهار «دوهلارې» سیمه کې د دواړو ولایتونو لپاره د برېښنا پر لوی سبسټېشن برید کړی چې تخنیکي توکي يې ځان سره وړي، ځینې يې تخریب کړي او د دې سبسټېشن د ساتونکيو ترڅنګ يې دوه انجینران هم ځان سره بيولي دي.
سرچينې وايي، طالبانو د هلمندـکندهار پر لويه لاره د امنيتي ځواکونو پر يو شمېر پوستو بريدونه کړي او هغه يې نيولې دي. خو د هلمند د والي وياند عمر ځواک وايي، امنيتي ځواکونو له ځينو پوستو تکتيکي شاتګ کړی او د بېرته نيولو لپاره يې عمليات پيل شوي دي.
د جوزجان ولایت د اقچې او مردیان ولسوالیو اوسېدونکي سلاموطندار سره خبرو کې شکایت کوي چې طالبانو د خپلې نفوذي ساحې په پراخولو سره د دغو ولسوالیو له خلکو جبري اخاذي کوي. د سیمې خلک وايي، وسلهوال طالبان له خلکو په زور نغدې پیسې اخلي او دغه کار لامل شوی چې د سیمې بېوزله خلکو ژوند نور هم تریخ شي.
طالبانو د امريکا د ولسمشرۍ په ټاکنو کې د امريکا د ولسمشر ډونالډ ټرمپ د بريا هيله او ملاتړ کړی دی. د تېرې جمعې په ورځ د طالبانو يوه وياند ذبیحالله مجاهد له سيبياس خبري اژانس سره په ټلفوني اړيکه کې ويلي چې دوی هيله لري ټرمپ يو ځل بيا د امريکا ولسمشرۍ ټاکنو کې بريالی شي.
د ولسمشر دویم مرستیال سرور دانش په کابل کې د خبرو پرمهال وویل، په بینالافغاني خبرو کې د طالبانو بې ځایه ضد دغه خبرې له بن بست سره مخ کړې دي.
دانش د سولې خبرو کې له منځته راغلي وضعیته نیوکه وکړه او ويې ویل، افغان دولت د سولې په خبرو کې د پرمختګ لپاره د قران او سنت وړاندیز وکړ؛ خو طالبانو د قدرت ترلاسه کولو لپاره قران او سنت ته هم شا کړه او د سولې خبرو د بنسټ په توګه یې شریعت هم ونه مانه.
د بدخشان سيمهييز مسوولان وایي چې د ياد ولايت خواهان ولسوالۍ کې ۲۰ ولسي پاڅونکوونکي طالبانو سره يو ځای شوي دي.
د ياد ولايت امنيې قومندانۍ وايي، ياد شمېر ځواکونه د طالبانو له لوري له کلابندۍ وروسته دوی سره يوځای شوي دي.
د هلمند د والي ویاند عمر ځواک وايي، د ګرشک ولسوالۍ اړوند «مهاجر بازار» سيمه کې پر ۴۰۴ ډوله مسافروړونکي موټر د سړک غاړې ماين چاودنه شوې چې د ښځو او ماشومانو په ګډون ۵کسان په کې وژل شوي او ۱۰ نور ټپيان دي.
د کندهار د امنيې قومندانۍ وياند جمالناصر بارکزی سلاموطندار ته وايي، ناپېژاندو وسلهوالو تېره شپه يو نوی جوړ شوی ښوونځي په بمومو الوځولی دی. باکرزي وويل، ياد ښوونځی د ژړۍ ولسوالۍ «مهاجرینو کمپ» سیمه کې و.
یوه معتبره ولسي سرچینه سلاموطندار ته وايي، د دښتقلعه ولسوالۍ ایخانم تپه کې د سرحدي پولیسو مرکز ته نږدې د هاوان لګېدو پېښه کې ۷ سرحدي سرتېري وژل شوي او ۲ نور ټپيان دي. سرچینې وویل، تراوسه معلومه نه ده چې هاوان د کومې ډلې له خوا توغول شوی دی.
د ناټو سرمنشي ینس سټولټنبرګ د امریکا د ولسمشر ډونالډ ټرمپ خبرو په غبرګون کې وايي، امریکا باید له افغانستانه د خپلو ځواکونو د وتو په تړاو دې تړون سره مشوره وکړي. نوموړي دا څرګندونې تېره ورځ په يوه خبري ناسته کې د ناټو په مرکز بروکسل کې کړې دي.
افغان سولې لپاره د امریکا د بهرنيو چارو وزارت ځانګړي استازي زلمي خلیلزاد او افغانستان کې د ناټو غوڅ ملاتړ ماموریت قومندان سکاټ مېلر تېره ورځ د پاکستان د پوځ لوی درستیز قمر جاوېد باجوه سره لیدلي. خلیلزاد تېره ورځ « پنجشنبه د تلې ۱۷مه» پاکستان ته تللی.
۲۱کلن رامین تازه د کانکور ازموینه کې تر ګډون وروسته د کابل انجنیرۍ پوهنځي ته بریالی شو؛ خو غلو تېر ماښام د کابل ښار لومړۍ ناحیه کې وواژه. د رامین مور او د کورنۍ نور غړي یې وايي، په پولیسو یې باور له لاسه ورکړی او له امنیتي بنسټونو او حکومت نه هېڅ تمه نه لري.
د امريکا ولسمشر ډونالډ ټرمپ پر ټوېټر لیکلي، باید د امریکايي ځواکونو پاتې کوچنۍ ډله هم چې افغانستان کې خدمت کوي تر را روان میلادي کال پيل پورې هېواد ته ستنه شي. خو د نوموړي تر څرګندونو مخکې د امریکا د ملي امنیت سلاکار رابرټ اوبراین ویلي، امریکا د راتلونکي کال لومړیو کې د خپلو ځواکونو شمېر افغانستان کې ۲۵۰۰ ته کموي.
د هلمند د والي ویاند عمر ځواک وايي، تېره شپه د ګرشک ولسوالۍ «یخچال» سیمه کې د ملي اردو پر پوستې موټربم برید شوی چې ۴ سرتېري په کې وژل شوي او ۳ نور ټپیان دي.
د هلمند په ځينو ولسوالیو کې تازه د وسلهوالو طالبانو له لوري پر یو شمېر امنیتي پوستو د بریدونو او د افغان ځواکونو د هوايي بریدونو خبرونه ورکول کېږي؛ خو ترڅنګ يې د هلمند والي محمد یاسین وايي، په تېرو درېیو میاشتو کې وسلهوالو طالبانو په ډېره کچه چاودېدونکي توکي تر لاسه کړي او غواړي چې د عامه تاسیساتو په له منځه وړلو کې يې وکاروي.
جوزجان ولايت کې يوه امنيتي سرچينه سلاموطندار ته وايي چې يوه ولسي پاڅونکوونکي خپل دوه همکاران د موبايل د چارجر پر سر وژلي دي. د سرچينې د معلوماتو پر بنسټ، دا پېښه د سې شنبې په شپه د ياد ولايت د اقچې ولسوالۍ په يوه امنيتي پوسته کې شوې ده.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
