د امریکا د بهرنیو چارو وزارت ویلي چې چې د اتلو ښځو افتخاري جایزه ۷ افغان مېرمنو ته ورکوي. دغو ښځو په ۲۰۲۰ میلادي کال کې خلکو ته د کار پر مهال په هدفي وژنو کې خپل ژوند له لاسه ورکړی دی.
د بشري حقونو پخوانۍ غړې فاطمه خلیل، د ملي امنیت د جندر برخې مخکینۍ رییسه جنراله شرمیلا فروغ، مریم نورزاد چې په میدان وردګ او بامیان ولایتونو کې یې د قابلې په توګه کار کړی و، په غزني کې د پولیسو پخوانۍ افسره فاطمه رجبي، د بندخونو چارو د تنظیم ادارې پخوانۍ افسره فرشته، ننګرهار کې د انعکاس ټلوېزیون پخوانۍ ویانده ملاله میوند چې شاوخوا درې میاشتې وړاندې ووژل شوه او د ښځو حقونو فعاله فرشته کوهستانۍ هغه ښځې دي چې په بېلابېلو پېښو کې وژل شوي او ټاکل شوې یاده جایزه ورکړل شي.
د دغو افغان مېرمنو تر څنګ به د بلاروس، میانمار، کامرون، چین، کولمبیا، د کانګو ډیموکراټیک جمهوریت، ګواتیمالا، ایران، نیپال، سومالیا، اسپانیا، سرېلانکا، ترکیې او ونزوېلا هېوادونو ۱۴ نورې ښځې به هم د اتلو ښځو نړیواله جایزه واخلي.
د امریکا د بهرنیو چارو وزارت وايي چې د کورونا ویروس له کبله به د یادې جایزې د ورکړې مراسم په انلاین بڼه جوړ او ترسره شي.
د اتلو ښځو نړیواله جایزه، هغه جایزه ده چې هر کال د امریکا د بهرنیو چارو وزارت له لوري د نړۍ په کچه هغو ښځو ته ورکول کېږي چې د رهبرۍ، اتلولۍ، کار او د نورو لپاره د ځان قربانولو، په تېره د ښځو حقونو په برخه کې یې وړتیا ښودلې وي. دغه پروګرام له ۲۰۱۷ کال راهیسې پیل شوی دی.
د امیندواره ښځو متخصصه ډاکټره نسرین اوریاخېله، د میدان وردګ ولایت د مرکز میدان ښار ښارواله ظریفه غفاري، ماریا بشیر او مریم درانۍ هغه څلور نورې افغان مېرمنې دي چې په تېرو دورو کې یې دا جایزه ګټلې ده.
