د خوست امنیتي چارواکي تاییدوي چې پاکستاني پوځیانو د دغه ولایت په سپېرې ولسوالي کې د وزیرستان کډوالو څلور کلي «مندته، امیر سپر، پڅي ميلې او شکوڼي» بمبار کړي. چارواکي وايي، برید مرګژوبله هم اړولې، خو تراوسه يې کره شمېرې نه دي په ډاګه شوي.
د کونړ ځايي چارواکي وايي، پاکستاني ځواکونو تېره شپه شتلن ولسوالي کې پر استوګنیزو سیمو توپچي بریدونه کړي، چې د ښځو او ماشومانو په ګډون ۵ کسان په کې وژل شوي دي. دغو بریدونو کې یو کس ټپي شوی هم دی.
د امریکا د بهرنیو چارو وزارت له اسلامي امارت څخه غوښتي چې له شپږم ټولګي پورته د نجونو زدهکوونکو ښوونځي له کوم ځنډ پرته بېرته پرانیزي. د دغې وزارت ویاند نیډ پرایس په یوې غونډه کې خبریالانو ته ویلي چې له شپږم ټولګي پورته د نجونو زدهکوونکو د ښوونځیو تړل پاتې کېدل، په دغه هېواد کې میلیونونه افغانان ناهیلي کړي دي.
وروسته له هغې چې په ایران کې د افغان کډوالو د زورونې او او زورزیاتي په غبرګون کې د هېواد په یوشمېر ولایتونو کې اعتراضونه وشول، د کډوالو چارو وزارت مسوولان د افغان کډوالو د ستونزو هواري په موخه د څلور اړخیزې ناستې له جوړېدو خبر ورکوي. د یاد وزارت په وینا، د دې غونډې هدف دا دی چې د افغان کډوالو پر ستونزو خبرې وشي او حللاره ورته وموندل شي.
د افغانستان د عدالت او توسعې ګوند له اسلامي امارت څخه غوښتنه وکړه چې د خپل بهرني سیاست تګلاره دې بدله کړي.
د کندهار د صنعت کارانو د ټولنې مسوولان وايي، د دغه ولایت په صنعتي پارک کې زیاتره فابریکې د برېښنا نشتون له امله تړل شوي چې ورسره زرګونه کسان وزرګار شوي دي.
د روغتیا نړیوال سازمان رییس تېدروس ادهانوم ګیبریوس ویلي، سره له دې چې بشري ناورینونه ټول انسانان یو ډول تر اغېز لاندې راولي، خو دغو ناورینونو سره بیا د نړۍ مبارزه توپیر کوي. دی وايي، نړۍ چې څومره پام اوکراین ته کړی، یوه برخه یې افغانستان او نورو اړمنو هېوادونو ته نهدی شوی.
د ایران د بهرنیو چارو وزیر حسین امیر عبداللهیان تهران کې د عراق د بهرنیو چارو له وزیر فواد حسین سره کتلي دي.
د اسلامي امارت د پوهنې وزارت مسوولان وايي چې له شپږم ټولګي پورته د نجونو زدهکوونکو د ښوونځیو د بیا پرانستلو لپاره هڅې روانې دي او په دې برخه کې تر یوه بریده پرمختګ شوی دی.
په پکتیا کې ولایت کې د «پکتیا غږ» په نوم د یوې محلي راډيو مسوولان وايي چې د اقتصادي ستونزو له امله یې خپل نشرات درولي دي. دغې راډیو له تېرو ۱۷ کالو څخه په دغه ولایت کې فعالیت کاوه.
نړیوال بانک ویلي چې د روان کال تر پایه به د افغانستان د کورني ناخالصو تولیداتو کچه ښايي تر ۳۰ سلنې راکمه شي. نړیوال بانک د افغانستان وضعیت په اړه په خپل یوه تازه راپور کې ویلي چې د دغه هېواد د کورني ناخالص تولیداتو کمښت له ۲۰۰۷ کال راپدېخوا کمساري دي او کورنۍ یې له ګڼو ستونزو سره مخ کړي دي.
د اسلامي امارت ویاند ذبیحالله مجاهد د پخوانیو دولتي سرتېرو د وژلو او تښتولو په اړه د نیویارک ټایمز راپور بې اساسه (مغرضانه) او له حقیقته لرې بللی دی.
مجاهد نن ماښام په خپل ټویټر کې لیکلي چې اسلامي امارت عمومي عفوه اعلان کړی او د اسلامي امارت ځواکونه حق نه لري چې له چا څخه غچ ( انتقام ) واخلي.
د امریکا د بهرنیو چارو وزارت خپل کلني رپوټ کې ویلي چې واک ته د اسلامي امارت له رسېدو وروسته، افغانستان د بشري حقونو او دیموکراتیکو لاسته راوړنو څخه لرې شوی دی.
د امریکا بهرنیو چارو وزیر انټوني بلنکېن وايي، د اسلامي امارت له واکمنېدو راهیسې، افغانستان بشري بحران سره هم مخ شوی دی.
د افغانستان بانک اعلان کړی چې د مالي او بانکي سکتور د بیارغونې ستراتیژیک پلان له مخې او شته امکاناتو ته په پام، د دولتي او نادولتي کارکوونکو پر معاشونو لګول شوي بانکي محدودیتونه لرې شوی دی.
د نیویارک ټایمز ورځپاڼې د یوه تازه څېړنیز راپور پایلې ښيي چې ا.ا د خپل حکومت په لومړیو شپږو میاشتو کې د مخکیني حکومت شاوخوا ۵۰۰ امنیتي ځواکونه او کارکوونکي وژلي او یا یې برمته کړي دي. په راپور کې راغلي، د ا.ا له لوري د ټولبښنې اعلان د «دروغو ادعا» وه او د مخکیني حکومت د پوځیانو لپاره په لومه کې د راګېرولو په موخه استفاده شوې ده.
ایران کې د افغان کډوالو د زورونې او وهل ټکولو په اړه د غبرګونونو په لړ کې نن کابل کې یوشمېر کسانو د ایران پر ضد لاریون وکړ.
دغه لاریون چې د افغانستان د مدني ټولنو او د ولسي انسجام شورا له لوري جوړ شوی و، په کې له ملګرو ملتونو او نړیوالو بنسټونو غوښتنه وشوه چې ایران کې له افغان کډوالو سره د روان ظلم پر وړاندې خپله چوپتیا ماته کړي.
