د اسلامي امارت ویاند ذبېحالله مجاهد په افغانستان کې د مذهبي ازادیو د نقض په اړه د امریکا د بهرنیو چارو وزارت د راپور په غبرګون کې ویلي چې افغانستان کې د مذهبي لږکیو حقونه خوندي دي. ذبېحالله مجاهد نن پر خپله ټویټرپاڼه لیکلي چې په دې اړه د امریکا د بهرنیو چارو وزارت راپور نیمګړی او د ناسمو معلوماتو پر بنسټ جوړ شوی دی.
د کونړ محلي چارواکي وايي چې د دغه ولايت په ځنګلونو کې د تازه اور لګېدنې په اړه خپاره شوي خبرونه ناسم دي.
ولایت مقام په يوې خبرپاڼه کې د والي محمدقاسم خالد له قوله ويلي چې څه موده وړاندې د چپې درې، شيګل او ناړۍ ولسواليو په يوشمېر ځنګلونو کې د اور لګېدنې پېښې رامنځته شوې وې چې ځایي مسوولانو او ولسي خلکو په ګډه همکارۍ مهار او مړ شوی دی.
د صنعتي ټولنو مسوولانو نن په کابل کې د یوې خبري ناستې پرمهال هغه اندېښنې رد کړې چې ګواکې افغانستان د درملو له کمښت سره مخ دی.
ګارډین ورځپاڼې راپور ورکړی چې واک ته د اسلامي امارت تر رسېدو وروسته، افغانستان د القاعده شبکې لپاره پر یوه امن پټنځای بدل شوی او په یاد هېواد کې په ازاده توګه فعالیت کوي چې په راتلونکې کلونو کې به له لرې لارې د بریدونو توان ولري. ګارډین د ملګرو ملتونو د غړیو هېوادونو له لوري د معلوماتو پربنسټ د جوړ شوي راپور له قوله ویلي، د القاعده فعالیتونه به د افغانستان امنیت وګواښي.
نړیوال بانک اعلان کړی چې د افغانستان د بیا رغونې لپاره د مدیریت صندوق سره یې د ۷۹۳ میلیونه ډالرو په ارزښت درې پروژې چې پهکې کرنه، روغتیا او د خلکو د لومړنیو اړتیاو پوره کول شامل دي، تصویب کړي دي. نړیوال بانک یوې خبرپاڼه کې ویلي، دغه پروژې به د ا.آ له کنټرول پرته، د ملګروملتونو د بنسټونو او نادولتي سازمانو له لوري پلې کېږي.
د هلمند محلي مسوولان وایي چې په دغه ولایت کې د دوو وروڼو ترمنځ د ځمکې پر سر شخړه کې یو ورور ټپي شوی او مور یې وژل شوې ده.
د ننګرهار د رسنیو دفتر ویلي چې د دغه ولایت مسوولانو او امنیتي ځواکونو د چپرهار ولسوالي د «کارېز» له سیمې د یاسین په نوم یو ځوان چې څو ورځې وړاندې یې خپل پلار وژلی و، نیولی دی.
د بلخ د امنیې قومنداني مسوولان وايي چې له درېوو میاشتې وروسته یې د یوې وژل شوې ۳۳ کلنې مېرمنې مړی، د اوبو په یوې څاه کې موندلی دی.
د پاکستاني طا لبانو تحریک یا ټيټيپي د کابل په کوربهتوب د پاکستان له حکومت سره تر نامعلومې نېټې اوربند غځولی دی.
د ټيټيپي له لوري په یوې ویناپاڼه کې ویل شوي چې د ا.ا په منځګړیتوب یې پاکستان څخه کابل ته له ورغلې جرګې سره تر پرمختګ وروسته د اوربند د غځولو پرېکړه کړې ده.
د قزاقستان رسنیو په دې وروستیو کې راپور ورکړی چې د افغانستان لپاره د ملګرو ملتونو د سرمنشي ځانګړې استازې ډیبرا لاینز او ورسره مل پلاوی یې د دغه هېواد له جمهوررییس قاسم جومر توقایف سره کتلې. د دې لېدنې اصلي موخه د افغانستان وضعیت ارزول، له ترهګرۍ سره مبارزه او په افغانستان کې د اروپايي ټولنې او د منځنۍ اسیا د هېوادونو د ځانګړو استازو ترمنځ د دوه ورځې مخکې د غونډې پر پایلو بحث بلل شوې ده.
هرات کې یوشمېر ښځو نن د «شمامه نجونو» تر نوم لاندې دوه ورځنی هنري او فرهنګي نندارتون پرانسته. د نندارتون جوړونکي وايي، له دغه نندارتون څخه یې موخه د هغو ښځو او نجونو ملاتړ دی چې اړ شوي، خپل مخونه پټ کړي.
د هند د بهرنیو چارو وزارت یو پلاوی افغانستان ته د بشري مرستو د لېږد بهیر د څارنې په موخه کابل ته راغلی دی. د هند د بهرنیو چارو وزارت په یوه خپره کړې خبرپاڼه کې ویلي چې ټاکل شوې دغه پلاوی اسلامي امارت سره د نوي ډیلي د مرستو په اړه خبرې وکړي.
د بشري او مدني حقونو شاوخوا ۲۵ نړیوالو سازمانو په یوه لیک کې د ملګرو ملتونو د بشرحقونو شورا څخه غوښتنه کړې چې د دغې شورا په پنځوسمه ناسته کې د افغان ښځو د حقونو په اړه بحث وکړي. په ورته مهال دوی ویلي، اسلامي امارت د ښځو او نجونو پر ازادۍ، راټولېدنې او اعتراض پراخ محدودیتونه لګولي دي.
کابل کې د ډبرو سکرو یوشمېر پلورونکي وایي، د اسلامي امارت تر راتګ وروسته، د ډبرو سکرو په بیو او صادراتو کې د پام وړ زیاتوالی راغلی دی.
د خبریالانو د خوندیتوب نړیوالې کمېټې د سلاموطندار د خبریال رومان کریمي د نیولو او وهل ټکولو په اړه د څېړنې غوښتنه کړې ده. دغې کمېټې په یوه راپور کې ویلي، د ا.ا مسوولان باید د سلاموطندار د خبریال او موټر چلوونکي نیول وڅېړي. دې کمېټې د دوو محلي راډیوګانو د مسوولانو جمالالدین دلدار او میرزا حسني د خوشې کېدو غوښتنه هم کړې ده.
د افغانستان لپاره د ملګرو ملتونو ځانګړي رپورټر ریچارډ بنټ ویلي چې په ترکیه کې له افغان مېرمنو، مدني ټولنو غړیو، زدهکړیالانو د ولسي جرګې مخکینیو غړیو او د مخکیني حکومت له یوشمېر چارواکو سره لیدلي دي. نوموړي پر خپله ټویټرپاڼه لیکلي چې دغه لیدنه غیررسمي، لنډه او ډېره ګټوره وه.
