له هغه وروسته چې د ملګرو ملتونو د بشري مرستو د همغږۍ ادارې یا اوچا په یوه تازه راپور کې له افغانستان سره د خپلو مرستو د کمېدو خبر ورکړ، د اقتصاد وزارت د دغه راپور په غبرګون کې ویلي چې ملګري ملتونه او مرستندویه بنسټونه باید په افغانستان کې د بنسټیزو پروژو په پلي کولو سره د هېواد له اقتصادي ودې سره مرسته وکړي.
کندهار کې د هېواد په کچه د درملو جوړولو تر ټولو لویه کارخونه چې د ۷۱ سوداګرو له لوري په ګډه د ۵۰ میلیونه ډالرو په پانګونه جوړه شوې او ۶۰۰ کسان به پهکې کار کوي. مسوولان وايي چې اوس د دې کارخونې یو فاز فعال شوی او پاتې دوه نور به یې هم فعال کړي.
د لغمان او ننګرهار اوسېدونکي د کابلـجلالاباد پر لویې لارې له وروستیو ټرافیکو پېښو وروسته غوښتنه کوي چې د دې لویې لارې دویم سړک دې جوړ شي.
د دوی په وینا، که څه هم له اوږدې مودې راهیسې د یاد سړک سروې بشپړه شوې، خو لا یې هم چارې ټکنۍ دي. د خلکو په خبره، هره ورځ پر دې لارې ټرافیکي مرګونې ټرافیکي پېښې کېږي چې له کبله یې هر کال لسګونه کورنۍ د ویر پر ټغر کېني.
د بدخشان مرکز فیضاباد ښار درېیمه ناحیه کې یوه ځوان په خپل شخصي لګښت د ۲۰۰زره افغانیو په لګښت یو تفریحي پارک جوړ کړی دی.
د «الماس تفریحي تمځای» په نوم د یاد پارک مالک عبدالواجد فاضل سلاموطندار ته ویلي چې دغه تفریحي پارک یې په یو جریب ځمکه کې جوړ کړی چې د ښځو او نارینهوو لپاره جلا ځایونه لري.
زابل کې یوشمېر بڼوال وايي، تازه ثمر ته رسېدلي باغونه به یې سږکال د تېر کال په پرتله په کمسارې توګه ډېر حاصلات ورکړي.
دغه بڼوال هیله څرګندوي چې سږکال به د طبیعي افتونو نهشتون او د ډېرو ورښتونو له امله له خپل تازه ثمر ته رسېدلو باغونو څخه د تېرکال په پرتله ۶ برابره زیات د بادامو حاصلات راټول کړي.
د افغانستان برښنا شرکت مسوولانو نن (د غبرګولي څوارلسمه، د یکشنبې ورځ) په کابل کې د یوې خبري غونډې پر مهال وویل چې دغه شرکت د ګاونډیو هېوادونو د برښنا پورونه پرې کړي او اوس د هېڅ هېواد پوروړی نهدی. د دوی په وینا، برښنا شرکت اوس په عادي ډول هره میاشت د ۱۵ میلیونه ډالرو په ارزښت برښنا له ګاونډیو هېوادونو را واردوي.
د لوګر یوشمېر اوسېدونکي وايي چې د دغه ولایت په ولسوالیو او لرې پرتو سیمو کې د برښنا نهشتون له امله له بېلابېلو ستونزو سره لاس او ګرېوان دي.
دوی سلاموطندار وویل چې د ازبکستان وارداتي برښنا یوازې پلعلم ښار ته ورکړل شوې او د ټولو ولسوالیو اوسېدونکي برښنا څخه محروم دي.
د ښځو حقونو یوشمېر فعالانې وايي چې د ښځو حقونو ملاتړ بنسټونو په ځانګړې توګه د ښځو چارو وزارت د فعالیتونو درېدو له امله د جبري او په کم عمر کې د ودونو کره شمېر په لاس کې نهلري، خو په وینا یې، هغه اطلاعات او راپورونه چې دوی ته رسېدلي، ښايي چې هېواد کې د جبري او کم عمر کې د ودونو شمېر زیات شوی دی.
د کورنیو چارو وزارت د پاسپورټ عمومي رییس عبدالکریم حسیب وايي، دغه ریاست هره میاشت څه باندې ۱۰۰زره جلده پاسپورټونه هېوادوالو ته وېشي.
د پاسپورټ عمومي رییس دغه څرګندونې پرون شنبه د غبرګولي ۱۳مه د ریاستالوزرا اداري مرستیال عبدالسلام حنفي ته د یاد ریاست د کارکړنو او فعالیتونو د راپور وړاندې کولو پر مهال کړي دي.
کابل کې د فرانسې طبي انسټیټیوټ او د «ماشوم روغتیا» روغتون کې یوشمېر ډاکټران وايي چې هېواد کې د انومالي ماشومانو شمېر زیات شوی دی.
د کابل د ماشوم روغتیا روغتون کې د عمومي جراحي متخصص محمدحنیف تسل وايي چې په منځنۍ کچه هره ورځ دغه روغتون کې یو ماشوم له «مقعد» پرته پیدا کېږي چې دوی یې جراحي عملیات کوي.
هرات کې د کاپیسا شرکت له لوري د «عالي دي، افغاني دي» په نوم د کرنیزو تولیداتو او لاسي توکو درې ورځنی نندارتون پرانېستل شو.
دغه نندارتون چې نن پنجشنبه د غبرګولي یوولسمه هرات ښار کې جوړ شوی، په ۱۳۲ غرفو کې بېلابېلې دویزې جامې، ګاڼې، د انځورګرۍ تابلوګانې، زینتي لوښي د خوړو مسالې او تازه مېوې نندارې ته کېښودل شوي دي.
بغلان کې یوشمېر ګیلم اوبدونکي وايي، دغه ولایت کې د یاد صنعت د تولید کمرنګه بازار ناهیلي کړي او په وینا یې، که یاد وضعیت همداسې دوام وکړي، لرې نه ده چې بغلان کې د ګیلم اوبدلو صنعت لهمنځه لاړ شي.
د غور یوشمېر کروندګر او بڼوال وايي چې د نباتي ناروغیو او افتونو د لهمنځه وړلو لپاره له دودیزو لارو چارو کار اخلي او د نویو مېتودونو په اړه په څه نه پوهېږي.
د تخار ینګيقلعه کې یوې کورنۍ سلاموطندار ته د تصویرونو په استولو سره ویلي، ۱۵کلن زوی یې له تېر یوه کال راهیسې د ایران فارس ولایت کې اوسېده چې په مرموز ډول وژل شوی دی.
دغه هلک رامین نومېده او د کورنۍ په وینا یې، د روانې غبرګولي میاشتې په اوومه د ایران د فارس ولایت مرودشت سیمه کې د ناپېژنده کسانو له لوري وژل شوی دی.
د کابل ښار یوشمېر اوسېدونکي شکایت کوي چې هټۍوالو، لاسپلورونکو او کراچۍ لرونکو کسانو په ټول ښار کې خپل توکي د سړکونو او پلیو لارو پر سر د خرڅلاو لپاره ایښي او دوی تر پوزې راوستي دي.
د کابل ښار اوسېدونکې محبوبه وايي، ډېر کله د هټۍوالو او کراچۍلرونکو له لوري د پلیو لارو د بندېدو له امله له ستونزو سره مخامخ شوې ده.
د افغانستان بانک نن چهارشنبه د غبرګولي لسمه پر خپله ټوېټرپاڼه لیکلي چې په ورځنۍ راکړه ورکړه د هېوادوالو د اسانتیاو په موخه نوي بانکنوټه بازار ته وړاندې کوي.
