د هرات-خواف اوسپنې پټلۍ له لارې د سوداګریزو توکو د لېږد پیل سره هممهاله د یادې اوسپنې پټلۍ د څلورمې برخې د رغېدو چارې له «روزنک» تمځای څخه پرون سهشنبه د چنګاښ ۲۰مه پیل شوې.
د سرپرست حکومت مسوولان وايي چې د خواف-هرات اوسپنې پټلۍ څلورمه برخه به د دغه ولایت صنعتي پارک پورې وغځول شي.
د زابل محلي مسوولان وايي چې د سرپرست حکومت د مشرتابه د پرېکړې له مخې یې دغه ولایت کې د بهرنیو اسعارو په ځانګړې توګه د کلدارې پر کارونې بندیز لګولی دی.
په سوېل زون کې زابل د هغو ولایتونو له ډلې دی چې اوسېدونکي یې له کلونو راهیسې په سوداګریزه راکړه ورکړه او پېر او پلور کې بهرني اسعار په ځانګړې توګه کلداره کاروي.
اسلامي امارت په سویډن کې د قرآن کريم د سوځولو په غبرګون کې د دغه هېواد اړوندو ټولو بنسټونو د فعاليت ځنډېدو امر کړی دی. د سویډن کمېټه په افغانستان کې یو مهم بهرنی بنسټ دی چې په ۱۴ ولایتونو کې خلکو ته د روغتیايي خدمتونو وړاندې کولو په ګډون، په بېلابېلو سکټورونو کې فعالیت کوي.
د ازموينو ملي ادارې مسوولان وايي، د سږکال کانکور ازموينه به د يوې مياشتې په موده کې د هېواد له ګوټ ګوټ څخه د ۱۰۰زرو داوطلبانو په ګډون پنځو پړاوونو کې واخيستل شي دوی وویل، د کابل کانکور ازموینه به هم څلورم پړاو کې واخیستل شي.
د کابل ښار د دیارلسمې ناحیې اړوند د دشتبرچي اسیابینې سیمې يوشمېر اوسېدونکي د اوبو له کمښت څخه شکايت کوي او وايي، له شاوخوا دوو کلونو راهيسې د اوبو له کموالي سره مخامخ دي. د دوی په خبره، ډېری کورنۍ د اوبو د کمښت له امله له دې سیمې کډه شوې دي.
د کابل ښار یوشمېر اوسېدونکي وايي چې د واټونو پر غاړه د خوړو او څښاک تیاروونکي روغتیايي ټکي په پاک کې نه نیسي او یوازې خپلې ګټې وټې ته یې پام دی.
دوی پر هغو خلکو هم نیوکې کوي چې د یادو خوړو او څښاک وضعیت ته له پام پرته ورځي او هغه خوري یا یې هم څښي.
په سرپل کې د خولیو ګنډونکي وايي چې د خولۍ ګنډلو صنعت د دغه ولایت مهم لاسي صنایع دي، خو اوس دغه لرغونی صنعت له ورکېدو سره مخامخ دی.
د دوی په وینا، پخوا د دغه صنعت بازار ښه و، خو د بهرنیو خولیو له واردېدو سره ۷۰ سلنه ښځو خپل کاروبار له لاسه ورکړی دی.
د تېرو دوو اوونیو پر مهال د پکتیا مرکز ګردېز په ګډون لجهمنګل او روحاني بابا ولسوالیو کې د سېلابونو له امله خلکو ته ګڼ مالي زیانونه اوښتي دي.
د کابل ښاروالي مسوولان وايي چې د غږیزې ککړې مخنیوي لپاره یې پلازمېنه کابل ښار کې د لاوډسپیکرونو پر استفادې بندیز لګولی دی.
کابل ښاروالي پرون یکشنبه د چنګاښ ۱۷مه پر خپله ټوېټرپاڼه لیکلي چې کابل ښار کې دې ایسکریم، ترکاري او د لاسي توکو پلورونکي باید له دې وروسته د توکو پلور لپاره له لاوډسپیکرونو استفاده ونه کړي
د لوګر د کلیو پراختیا او بیارغونې ریاست مسوولان وایي چې د ملګروملتونو د ماشومانو ملاتړ صندوق «UNICEF» له لوري په خروار ولسوالي کې د څښاک پاکو اوبو رسولو یوه شبکه جوړېږي.
د کانونو او پټرولیم وزارت مسوولان وايي چې پرون شنبه د چنګاښ ۱۷مه د سرپل د قشقري نفتو څاهګانو څخه د نفتو د استخراج بهیر پیل شو.
د یاد وزارت سرپرست شهابالدین دلاور دغه ولایت ته د سفر پر مهال ویلي چې قشقري د هېواد مهمه اقتصادي سرچینه ده او په وینا یې، د قشقري د نفتو د عاید یوه برخه به د سرپل ولایت پر بیارغونه او پراختیا ولګول شي.
د صنعت او سوداګرۍ وزارت مسوولان سلاموطندار ته وايي چې د «جنس په جنس» سوداګرۍ پر طرحې کار روان دی او تر راتلونکې یوې میاشت به بشپړه شي.
د یاد وزارت ویاند جواد اخندزاده وايي چې د دغه وزارت مسلکي ټیمونه د بارټر «جنس په جنس» سوداګرۍ طرحې باندې کار کوي او تر راتلونکې میاشت به یې کار بشپړ شي.
د پکتیکا د اطلاعاتو او فرهنګ رياست مسوولان وایي چې سر له سبا «شنبه_چنګاښ ۱۷مه» دغه ولایت کې د کلدارې کارونه بنده ده او ټوله راکړه ورکړه به پر افغانۍ کېږي.
د اطلاعاتو او فرهنګ وزارت د ګرځندوی ریاست مسوولان وایي چې تېر ۱۴۰۱ کال کې افغانستان ته ۶زره بهرني سيلانيان راغلي و چې د هېواد له بېلابېلو سيمو او تاریخي ځایونو څخه یې لیدنه کړې ده. د نوموړي په وینا، سږ کال د بهرنیو سیلانیانو د ورماتولو لپاره یې هڅې پیل کړي او تمه لري چې روان کال به لسزره بهرني سيلانيان هېواد ته راشي.
پروان ولایت کې د سترګو پر ناورغي اخته یوشمېر ناروغان له حکومت غواړي چې د دغه ولایت په تخصصي روغتون کې دې د سترګو ناروغیو د درملنې څانګه پرانېستل شي.
دوی سلاموطندار ته وايي چې د خپلې درملنې لپاره پلازمېنې کابل ته ځي او په وینا یې، دې ولایت کې باید ورته د درملنې زمینه برابره شي.
د افغانستان پر سولې د څار ادارې په دې وروستیو کې د یوه راپور په خپرولو سره ادعا کړې چې په هلمند، ننګرهار او کندهار ولایتونو کې د امریکايي وسلو بازار تود شوی دی. خو اسلامي امارت دغه راپور ردوي او وايي، سرپرست حکومت د وسلو په ساتلو کې جدي دی او هېچا ته اجازه نه ورکوي چې د وسلو پېر او پلور وکړي.
