د کورنیو چارو وزیر محمدمسعود اندرابي وايي چې د دغه وزارت د پلان له مخې، ټاکل شوې تر ۲۰۲۴ کال پورې د ښځینه پولیسو شمېر ۱۰ زرو ته زیات شي.
نوموړي دا څرګندونې نن په کابل کې ملت ته د دولت حسابورکونې په غونډه کې کړې دي. هغه وايي، د ښځینه پولیسو د شمېر ډېروالي تر څنګ به هغه وکړي چې د هغوی د زدهکړو او وړتیا کچه هم لوړه شي.
د تخار د پوهنې ریاست مسوولانو سلاموطندار ته ویلي چې طالبانو په دغه ولایت کې ښوونځي ته د نجونو د تګ مخه نیولې ده. د دوی په وینا، د طالب ډلې وسلهوالو د تخار په «قلبرس» او «چایله» سیمو کې نجونو ته د ښوونځي د تګ اجازه نه ورکوي. د تخار د پوهنې ریاست د مسوولانو په خبره، که څه هم یادې ډلې نن سهار د سیمې د خلکو په منځګړتوب د تالقان ښار په «قلبرس» سیمه کې اجازه ورکړې چې نجونې ښوونځي ته ولاړې شي، خو دا ستونزه د بهارک ولسوالي په «چایله» سیمه کې لا پر خپل ځای ده.
افغانستان د غوښتنې سرچینو او له صنعته لرېوالي له کبله کولای شي د ځمکې کُرې د تودېدو پر وړاندې د نړۍ مشرتوب پر غاړه واخلي چې نړۍ دا یوه بېلګه بللې او کولای شي د نړیوال اقتصادي پرمختیا د سازمان ستاینه او درناوی خپل کړي.
په مزارشریف کې ۴۰ نجونو او هلکانو خپل ودونه په ډلهييزه توګه وکړل. دا ډلهييز واده چې شاوخوا يو ميليون افغانۍ لګښت پرې راغلی د څو خصوصي بنسټونو په مالي مرسته وشو. دغه جوړې وايي، له دې کاره يې موخه ډلهييزو ودونو ته د خلکو هڅول دي او په دې کار سره غواړي چې د ودونو ناوړه دودونه له منځه يوسي.
د کورونا ویروس چې په نږدې ټوله نړۍ کې خپور شوی، د پیدا کېدو او خپرېدو یې له یوه کاله ډېره موده کېږي. په لومړي ځل د چین د ووهان ښار یو اوسېدونکی پر دغه ویروس اخته شو. که څه هم خلکو د دغه ویروس له خپرېدو وروسته د ټولنیز واټن او نظافت په پام کې نیولو او ماسک اچولو سپارښتنې په پام کې نیولي، خو لا هم په ترکیه کې هره ورځ لسګونه کسان د دغه ویروس له کبله مړه کېږي او سلګونه نور پرې اخته کېږي.
د کورنیو چارو وزارت وايي، هغه ۵ امنیتي ځواکونه يې له دندو ګوښه کړل چې څه موده وړاندې يې د ياد وزارت د قراول سرتېري ګواښلي او يو سرتېری يې ډبولی و.
د ملي پخلاينې عالي شورا ويلي، د امريکا د بهرنیو چارو وزارت ځانګړي استازي زلمي خليلزاد د يادې شورا له رییس عبدالله عبدالله سره ليدلي دي.
له يادې شورا نن په خپره شوې خبرپاڼه کې راغلي، په دې لیدنه کې دواړه لوريو د سولې د خبرو پر چټکتیا او د امریکا د نوي حکومت له لوري د سولې د هوکړې پر بیاکتنې ټینګار شوی دی.
کابل، دوحې او د سيمې هېوادونو ته د افغان سولې په اړه د امريکا د بهرنيو چارو وزارت د ځانګړي استازي زلمي خليلزاد تازه سفرونه پيل شول. د امريکا د بهرنيو چارو وزارت ويلي، خلیلزاد به دا ځل دوحې، کابل او د سيمې د هېوادونو يو شمېر پلازمېنو ته سفرونه وکړي.
د بامیانو روغتون مسوولان تاییدوي چې یو روغتیايي کارکوونکی د کورونا واکسین له ترلاسه کولو وروسته مړ شوی دی.
د ياد ولايت د روغتون رییس فروغ امیري وايي، په دې اړه د څېړنې په موخه د ياد روغتون د ډاکټرانو یو پلاوی ګمارل شوی ترڅو وګوري چې دغه روغتيايي کارکوونکی څنګه مړ شوی دی. د اميري په وينا، که څه هم دغه روغتیايي کارکوونکي د زړه ناروغي او د وینې لوړ فشار…
د اټومي انرژي ادارې مسوولان وايي، د ۱۳۹۹ مالي کال پر مهال د کابل په بېلابېلو سیمو کې د راډیواکټیف طبیعي موادو د ډېرو شعاعو لرونکې سیمې ثبت شوې دي.
د دوی په وینا، دغه مواد په کوهستانونو او د کابل د ودانیزو تیږو په کانونو، لکه د قصبې او افشارو غرونو او ځینو نورو سیمو کې شته.
د غور سلګونو اوسېدونکيو د دې ولايت د والي نورمحمد کوهنورد پر ضد لاريون وکړ. دوی وايي، والي د خلکو ترمنځ نفاق خپروي او مديريت کې کمزوری دی. لاريونوالو وويل، له کله چې کوهنورد د دغه ولایت د والي په توګه ټاکل شوی، غور ولايت کې د ناامنيو او د توکميزو اختلافاتو کچه لوړه شوې ده.
د امریکا او طالبانو ترمنځ په دوحه کې د ۱۳۹۸ کال د کب په لسمه د لاسلیک شوې هوکړې وروسته د عامو افغانانو هیله دا وه چې په امنیتي وضیعت او نورو برخو کې به مثبت بدلونونه راشي، خو د خلکو د تمې خلاف ناامنیو او هدفي وژنو د خلکو پر ژوند او اقتصاد منفې اغېز کړی دی. د دولت او طالب ډلې ترمنځ د سولې خبرې هم یوازې په چنې وهلو سره روانې دي او تر اوسه کومه پایله نه ده لرلې.
د افغانستان د بشري حقونو خپلواک کمیسیون له مسوولو بنسټونو غوښتي چې د غور غږ راډيو د پخواني مسوول بسمالله عادل د وژنې او د نوموړي د پلار په کور د برید په اړه څېړنې وکړي.
ياد کمیسیون نن په ټوېټ کې ويلي، د دوی د موندنو پر بنسټ د غور غږ راډيو د پخواني مسوول بسمالله عادل د پلار په کور د طالبانو وسلهوال برید کې د يوې ۱۳ کلنې نجلۍ په ګډون…
د روسیې د امنیت شورا منشي نیکولای پاټروشيوف وايي، تر هغه چې د سولې په خبرو کې مشخصه پايله ترلاسه نهشي، د ملګرو ملتونو د امنیت شورا له تور نوملړه د طالب مشرانو د نومونو ايستل له وخته مخکې ده.
بهرنيو چارو وزارت د يوې خبرپاڼې په خپرولو سره ويلي، دغه موضوع د روسیې د امنیت شورا منشي په مسکو کې له محمدحنیف اتمر سره په ليدنه کې مطرح کړې ده.
ولسمشر محمداشرف غني نن د سرتېري ملي ورځې په مناسبت غونډه کې د وینا پر مهال وویل چې نړیوالې ټولنې ۴۰ کاله افغانان له سولې بېبرخې پرېښي کړي دي.
د سرتېري ملي ورځ نن په ځانګړو مراسمو سره د ولسمشر او ګڼو نورو لوړپوړو چارواکو په ګډون د ملي دفاع وزارت په انګړ کې ونمانځل شوه. دا ورځ د پلازمېنې په ګډون، په ولایتونو کې هم ونمانځل شوه او خلکو خپلو سرتېرو ته د هغوی د سرښندنو ستاینې په موخه ګلان ورکړل.
د ولسمشر محمد اشرف غني پخوانی مرستیال او د افغانستان د اسلامي جنبش ګوند مشر مارشال عبدالرشید دوستم له یو نیم کال وروسته نن کابل ته راستون شو. نوموړی کابل ته د راګرځېدو موخه د هېواد روان وضعیت په اړه ولسمشر او سیاسي مشرانو سره لیدهکاته او خبرې بولي.
دوستم کابل کې د هغه د بېرته راستنېدو مراسمو کې د طالبانو له لوري د تاوتریخوالي له زیاتېدو نیوکه وکړه او ويې ویل، طالبان د هېواد وضعیت په ترینګلي کولو سره غواړي، د دولت پر وړاندې د خلکو باور زیانمن کړي.
