د دايکندي د ښځو چارو رياست مسوولان تاييدوي چې د ياد ولايت په مرکز کې د غلو يوې ډلې پر ۲۰ کلنې ښځې ډلهييز جنسي تېری کړی دی.
د ياد ولايت د ښځو چارو رييسه بېنظیر جعفري سلاموطندار ته وايي، تېره اوونۍ شپې مهال يوې ډلې غلو د مسافرو يو موټر درولی او مالونه لوټلي او وروسته يې پر يوې ۲۰کلنې مسافرې ډلهييز جنسي تېری وکړ.
د بلخ په شولګرې ولسوالۍ کې پر يوه هستوګنيز کور د هاوان مرمۍ لګېدو پېښه کې د یوې کورنۍ ۶ غړي وژل شوي دي. دغه پېښه تېره ورځ د يادې ولسوالۍ په «حلقهجر» سيمه کې شوې ده.
د قیصار ولسوالۍ کسبګر او هټیوال وايي، وسلهوالو طالبانو د ولسوالۍ بازار هټیوالو ته خبرداری ورکړی چې ژر تر ژره خپل تجارتي مالونه او توکي له بازار څخه وباسي. د هغوی په خبره، د طالبانو د دې خبرداري موخه دا ده چې هغوی پلان لري د ولسوالۍ پر ودانۍ او امنیې قوماندانۍ برید وکړي.
د اسلامي همکاریو نړیوال سازمان یو ځل بیا په افغانستان کې پر ښکېلو لورو د جګړو د درولو غږ کړی او له ښکېلو خواوو يې غوښتي چې جګړې پای ته ورسوي او د سولې لار خپله کړي.
د افغانستان د اسلامي ملي جنبش ګوند مشر مارشال عبدالرشید دوستم ته نږدې څېره عنایتالله بابر فرهمند له سلاموطندار سره خبرو کې وویل، په پام کې ده چې دوستم د سیاسي رهبرانو ترمنځ د اجماع جوړولو او د ورځ تر بلې ډېرېدونکيو ناامنیو د محارولو په اړه له ولسمشر غني سره د بحث په موخه، کابل ته راشي.
ویل کېږي چې په پام کې ده مارشال دوستم د ولسمشر محمد اشرف غني په رسمي بلنه کابل ته راشي او د طالبانو پر وړاندې د جګړې مسوولیت په غاړه واخلي؛ خو فرهمند په دې اړه د جزیاتو له ورکولو ډډه کوي.
د لويې څارنوالۍ مسوولان وايي، د ۱۳۹۹ مالي کال له پيله تر اوسه پورې د ښځو پر وړاندې د تاوتريخوالي ۳ زره پېښې ثبت شوې دي. د دوی په وينا، په وروستيو ۳ کلونو کې ۵۶۹ د جنسي تېري پېښې هم ثبت شوې دي.
په کابل کې د ملګرو ملتونو سیاسي استازولۍ یا یوناما د تازه راپور په خپرولو سره ویلي چې په قطر کې د افغان دولت او طالب استازيو ترمنځ د سولې خبرو پيلېدل نه دی لامل شوی چې د ملکي وګړيو مرګژوبله کمه شي.
د بلخ د پولیسو ویاند عادل شاه عادل سلام وطندار سره خبرو کې ویلي، پېښه تېره ورځ د کابل مزار په لویه لاره مزارشریف ښار ته نیږدې شوې چې په کې د دوو ماشومانو او یوې ښځې په ګډون ۹ کسانو ژوند له لاسه ورکړی.
د خوست د والي وياند طالب منگل وايي، په خوست کې د افغان ځواکونو پر ځانګړې قطعې موټربم بريد شوی.
د کورنیو چارو وزارت ویاند طارق ارین وايي، برید نن سهار شاوخوا پنځه نیمې بجې شوی او په پيل کې موټر بم د قطعې پر دېوال وهل شوی او ورپسې څو تنو ځان وژنکيو بریدګرو قطعې ته د ننوتلو هڅه کړې چې تر اوسه یې ۴ تنه وژل شوي او ۲ نور لا مقاومت کوي.
د ملي مصالحې عالي شورا وياند فريدون خوځون پر خپله فېسبوک پاڼه ليکلي چې د دولت د سولې د مذاکراتي پلاوي ۴ غړي د اداري او شخصي کارونو د ترسره کولو په موخه کابل ته راغلي او بېرته دوحې ته ځي.
په داسې حال کې چې له تېرې پنجشنبې راهيسې په قطر کې د سولې د مرکچي پلاويو د تماس ډلو ترمنځ ناسته نه ده شوې او مرکچي پلاوي د شاوخوا یوې نیمې میاشتې په تېرېدو سره نه دي توانېدلي چې د مذاکراتو د پیل لپاره کړنلاره جوړه کړي؛ نو له ځینو کارپوهانو سره داسې اندېښنې دي چې ښایي روان مذاکرات په ټپه ودرېږي.
ولسي جرګې هېواد کې د ناامنيو د ډېرېدو له کبله غوښتي چې د افغانستان او امريکا ترمنځ امنیتي تړون لغوه شي.
د يادې جرګې غړيو نن د دې جرګې په عمومي غونډه کې وویل، سره له دې چې امریکا ژمنه کړې وه چې د امنیتي تړون په لاسلیک سره به په افغانستان کې سوله ټینګه شي؛ خو اوس له څو کلونو وروسته د امریکا او افغانستان ترمنځ امنیتي تړون د هېواد امنیتي وضعیت ښه والي لپاره مرسته نه ده کړې.
د هرات د والي وياند جېلاني فرهاد سلاموطندار ته وايي، د کورنیو چارو وزارت د درنو جرمونو پر ضد د مبارزې ادارې کارکوونکيو د ولایتي چارواکيو په همکارۍ د ياد ولايت ښاروال غلامحضرت مشفق له خپلو ۹ کارکوونکيو سره يو ځای د اختلاس او د دولتي عوایدو د حيف او ميل په تور نیولي دي.
جوزجان کې د روغتيا نړيوال سازمان د ولايتي دفتر مسوولان وايي، په دې ولايت کې ۵۶زره ماشومان د پوليو ضد له واکسينه پاتې کېږي. دوی وايي، دغه ماشومان ډېری يې د طالبانو تر کنټرول لاندې سيمو کې دي.
جوزجان کې نن د پوليو ضد واکسين کمپاين پيل شو.
د بنګلهدېش دیني علماوو، مشايخو او مفتیانو «افغانستان کې د سولې پر لور دعوت» ترنامه لاندې په يوه ناسته کې په افغانستان کې روانه جګړه حرامه او له شرعي نصوصو سره په ټکر کې بللې ده.
د روسیې ولسمشر ولادیمیر پوتین وايي، په افغانستان کې د امریکايي پوځیانو د حضور دوام د سیمې د امنیت لپاره ګټور دی.
پوتين دغه څرګندونې تېره ورځ د روسيې له «يک ټلويزوني شبکې» سره کړې دي.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
