د افغانستان بانک اعلان کړی چې د هېواد بانکي سیستم به ډېر ژر بېرته خپل عادي حالت ته راوګرځي.
دغه بانک نن په یوې خپره کړې ویناپاڼه کې ډاډ ورکړی چې د هېواد بانکي سکټور به بېرته ښه شي او ډېر ژر به یې فعالیتونه عادي حالت غوره کړي.
د سلاموطندار پښتو فېسبوکپاڼه وڅارئ
په ویناپاڼه کې ټينګار شوی چې د نظام بدلون په ټولو هېوادونو کې یو اصل دی او د یوه نوي نظام په راتلو سره استفاده کوونکي او مغرض کسان هڅه کوي چې ستونزې راولاړې کړي.
د افغانستان بانک ویناپاڼه کې همداراز راغلي چې د بانک ټول چارواکي او مسوولان هڅه کوي، څو د هېواد بانکي سیسټم کې رامنځ ته شوې ټولې ستونزې حل کړي او هېوادوالو ته غوره خدمتونه وړاندې کړي.
د افغانستان بانک په داسې حال کې د هېواد د بانکي سیسټم د بیا عادي کېدو ډاډ ورکوي چې د اسلامي امارت په راتلو او د اقتصادي ناورین له رامنځ ته کېدو سربېره په هېواد کې د نغدو پیسو کمښت، بانکي سیسټم د پاشلتیا له ګواښ سره مخ کړی دی.