په اسلاماباد کې د افغانستان سفارت وايي چې د دغه هېواد د کراچۍ ښار له زندان څخه ۱۳۷ افغان کډوال خوشې شوې دي.
د افغانستان سفارت نن شنبه د کب ۱۳مه په یوې خبرپاڼه کې ویلي چې په تازه خوشې شویو ۱۳۷ کسانو کې ښځې او ماشومان هم شامل دي.
په خبرپاڼه کې همداراز راغلي چې خوشې شوي افغانان د چمن دروازې له لارې افغانستان ته لېږدول شوي دي.
په همدې حال کې د افغانستان سفارت په خپرې کړې خبرپاڼه کې ویلي، یاد افغان کډوال د قانوني اسنادو نشتون له امله د پاکستاني پوليسو له لوري بندیان شوي وو.
دا په داسې مهال دی چې له دې وړاندې هم یوشمېر افغان کډوال د کراچۍ ښار له بېلابېلو زندانونو څخه خوشې شوي وو. په ورته مهال د ځینو راپورونو پر بنسټ، د پاکستان په زندانونو کې د ځینو افغانانو د مړینې خبر هم ورکړل شوی دی.
د اسلامي امارت چارواکو همداراز له دې مخکې ټینګار کړی چې د پاکستان په زندانونو کې لا هم افغانان بندیان دي او په وینا یې، د خوشې کېدو هڅې یې رواني دي.
سلاموطندار پر ټوېټرپاڼه هم وڅارئ
په پاکستان د کډوالو چارو ځینې بنسټونه او فعالان وايي چې د دغه هېواد پولیس هغه افغانان هم نیسي چې قانوني اسناد لري. پاکستان کې یوشمېر افغانان هم وايي چې د قانوني اسنادو لرلو پرته بیا هم د یاد هېواد د پولیسو لهخوا نیول شوي دي.
