پاکستان کې د افغانستان سفارت ویلي چې د دغه هېواد د کراچۍ ښار له یوه زندان ۳۰ هغه افغان کډوال چې د قانوني اسنادو د نه لرله له کبله پولیسو بندیان کړي وو، د دوی په هڅو بېرته خوشې شوې دي.
باختر خبري اژانس نن سهشنبه د لړم ۱۷مه پر خپله ټوېټرپاڼه لیکلي چې دغه کسان د کراچۍ له یوه زندانه خوشې شوي او خپل هېواد ته ستانه کړل شوي دي.
دغه افغان کډوال داسې مهال خوشې کېږي چې پاکستان کې ګڼشمېر افغان کډوال د پولیسو لهخوا نیول شوي او زندان ته اچول شوي دي.
پرون دوشنبه پځواني ولسمشر حامد کرزي په یوې خبرپاڼه کې له افغان کډوال سره د پاکستان د حکومت چلن ته غبرګون ښودلی و او له دغه هېواد یې غوښتي و چې د نړیوالو بشري حقونو د اصولو پر بنسټ افغان کډوالو سره چلن وکړي.
حامد کرزي همداراز ویلي چې پاکستان د افغان ښځو او ماشومان په ګډون ۱۱۰۰ کسان نیولي او بندیان کړي یې دي.
سلاموطندار پر ټویټر هم وڅارئ
په ورته مهال یوشمېر افغان کډوالو پاکستاني رسنیو ته ویلي، د دغه هېواد پولیسو هغه کسان هم بندیان کړي چې قانوني اسناد لري.
خو پاکستاني چارواکي بیا وايي، هغه افغان کډوال یې نیولي او د نورو د نیولو هڅې روانې دي چې دغه هېواد ته له قانوني اسنادو پرته راغلي دي.
ګڼشمېر افغان کډوال هر کال پاکستان ته د درملنې یا هم کار لپاره ځي چې وخت نا وخت د دغه هېواد د پولیسو لهخوا ځورول کېږي.
