پرون مازدیګر د فاریاب ولایت قیصار ولسوالي د وسلهوالو طالبانو لاس ته ولوېده، خو ۳۰ امنیتي ځواکونه د طالبانو پر وړاندې له سخت مقاومت وروسته بریالي شوي چې یوازیني پاتې کلي (کوهي) ته ځان ورسوي او له نورو سرتېرو سره یوځای شي. خو لږ ځنډ نه وو وتلی چې دغه کلی هم طالبانو ونیوو او د شاوخوا ۱۰۰ سرتېرو له برخلیک څخه هېڅ خبر نه شته.
نږدې یوه میاشت کېږي چې وسلهوالوطالبانو د بغلان ولایت اړوند د نهرین ولسوالي پر مرکز بریدونه پیل کړي چې یوازې د دغه ولسوالي او د پولیسو د قومندانۍ ودانۍ د امنیتي ځواکونو تر کنټرول لاندې دي او پاتې نورو سیمو باندې طالبانو ولکه خپله کړې ده.
په تېرو ۲۴ساعتونو کې د هېواد له بېلابېلو ولایتونو څخه د یوشمېر ولسوالیو او امنیتي پوستو د سقوط خبرونه ورکړل شوي دي.
یوې حکومتي سرچینې د نوم او غږ نه خپرولو په شرط سلاموطندار ته ویلي، تېره شپه د ختیځ نورستان له دواب ولسوالي څخه امنیتي سرتېرو شاتګ کړی چې له امله یې یاده ولسوالي د طالبانو لاس ته لوېدلې ده.
یوې حکومتي سرچینې د نوم نه ښودو په شرط سلاموطندار ته ویلي، بېګاه شپه د نورستان ولایت له دوو ولسوالیو، دواب او منډول څخه امنیتي
سرتېري وتلي او دغه دواړه ولسوالۍ وسلهوالو طالبانو نیولي دي. د سرچینې په وینا، دغه دواړه ولسوالۍ له څه مودې راهیسې د وسلهوالو طالبانو تر سختې کلابندۍ لاندې وې چې بېګاه شپه د وسلهوالو طالبانو له لوري نیول شوي دي.
د هرات والي سیدعبدالوحید قتالي وایي، د دغه ولایت په فارسي ولسوالي کې د امنیتي ځواکونو او وسلهوالو طالبانو ترمنځ د نښتو له امله د دې ولسوالي امنیه قومندان او یو سرتېری وژل شوي او ۵نور ټپیان دي.
د ملي روغې جوړې عالي شورا رییس عبدالله عبدالله، نن د ۳۰۳ پامیر پخواني قومندان داوود داوود د وژل کېدو د لسم تلین په مراسمو کې د خبرو پرمهال د هېواد په اوسنیو شرایطو اندېښنه څرګنده کړه او وې ویل، په داسې حال کې چې د سولې خبرې ښې پایلې ته نه دي رسېدلي، له هېواده د بهرنیو ځواکونو وتل به پر امنیتي وضعیت ناوړه اغیزې وکړي.
د افغان سولې لپاره د امریکا د بهرنیو چارو وزارت ځانګړی استازی زلمی خلیلزاد وایي، هغه ګونګوسې ناسمې دي چې ګواکې له افغانستان څخه د بهرنیو ځواکونو له وتلو وروسته به وسلهوال طالبان په چټګې سره پرمختګ وکړي او کابل به تر خپلې ولکې لاندې راولي.
زلمي خلیلزاد چې د امریکا د کانګرس د بهرنیوچارو کمېتې ته خبرې کولې وویل، دا تېروتنه ده چې افغان ځواکونه تیت او پرک کېږي او لنډ وخت کې به واک طالبان ته ورسېږي.
یوه حکومتي باوري سرچینه وايي، وسله والو طالبانو له نیږدې یوې اونۍ راهیسې الینګار کې پر حکومتي پوستو بریدونه پېل کړي چې تر اوسه دغې ډلې د یوه مرکز په ګډون ۷پوستې له مرګ، ژوبلې پرته نیولي دي.
تر اوسه په دې ولسوالۍ کې د ملي اردو څلور پوستې، د ملي پولیسو دوه او یو ټولی، طالبانو نیولی دی.
د غور د تيورې ولسوالۍ یو شمېر اوسېدونکي او امنیتي مسوولان دغې ولسوالۍ کې ترینګلي امنیتي وضعیت او یو په بل پسې د ځینو سیمو او د امنیتي پوستو سقوط څخه اندېښنه ښيي او وايي، که چېرې دولت ورته جدي پام ونه کړي، دغه ولسوالۍ به د طالبانو لاس ته ولوېږي.
د يادې ولسوالۍ اوسېدونکي وايي، طالبانو خپل غوځښتونه زیات کړي او له هوايي ځواکه غواړي چې په اړه يې بېړنی ګام پورته کړي.
د روزګان ولايت محلي مسوولان وايي، د دهراوود ولسوالۍ له مرکز نه امنيتي ځواکونو «تکتيکي شاتګ» کړی دی.
د روزګان د والي ویاند احمد شاه ساحل ویلي چې تېره شپه وسلهوالو طالبانو پر بازار او امنیې قومندانۍ او ولسوالۍ او نورو نظامي مرکزونو ډلهییز بریدونه کړي او امنيتي ځواکونو د ملکي کسانو د مرګژوبلې مخنيوي لپاره «تکتيکي شاتګ» کړی دی.
له تېرو درېيو ورځو راهیسې د ننګرهار له حصارک ولسوالۍ د مرګژوبلې او د طالبانو په لاس د ځینو حکومتي پوستو د سقوط راپورونه ورکول کېږي. د سیمې اوسېدونکي د هویت نه څرګندېدو په شرط سلاموطندار ته وايي، طالبانو له درېيو ورځو راهیسې د حصارک پر یو شمېر پوستو ډلهییز بریدونه کړي او که تازه دمي سرتېري ور ونه رسېږي، دا ولسوالۍ به سقوط وکړي.
روزګان کې یوه امنیتي سرچینه چې نه غواړي نوم يې خپور شي سلاموطندار ته وايي، ګېزاب ولسوالۍ د طالبانو لاس ته لوېدلې ده.
د سرچينې په وينا، دغه ولسوالۍ د تېرې شپې له سختو جګړو وروسته طالبانو ونيوله.
