ولسمشر محمداشرف غني او ورسره مل پلاوي پرون له غرمې وروسته په واشنګټن کې د ډیموکراټانو د اکثریتو له مشر سناتور چارلز شومر او د جمهوري غوښتونکو د لږکیو له مشر سناتور میچ مکانیل او یوشمېر نورو سناتورانو سره ولیدل.
د ملي روغې جوړې شورا رییس عبدالله عبدالله په ترکیه کې د انتالیا د ډیپلوماسۍ په عمومي غونډه کې ویلي چې طالب ډله له نظامي لارې وړاندې ځي او له افغانستانه د بهرنیو ځواکونو له وتلو وروسته به له افغان حکومت سره سیاسي هوکړې ته لېوالتیا ونه لري. هغه د سولې خبرواترو پر ځای، پر نظامي لارې د طالبانو ټینګار ته په اشارې خبرداری ورکوي چې په دغه کار سره به یې ناسمه محاسبه کړې وي.
د پکتیا ولایت د اریوب ځاځیو ولسوالي مسوولان وایي، بهرنیو ځواکونو د ډېورنډ کرښې هغې غاړې پاکستاني لورې ته د يو لوی پوځي بېز په جوړولو بوخت دي او غواړي چې هلته دېره شي.
د اریوب ځاځیو ولسوال کفتان اخلاص سلاموطندار ته وایي، د ډېورنډ فرضي کرښې هغې لوري شيلوزان ترې منګل سیمه کې، بهرني ځواکونه په اکمالاتو او پوځي بېز جوړولو لګیا دي.
د لوګر، هرات، بغلان، بدخشان، پروان، فاریاب، ننګرهار، سمنگان، کاپیسا او پکتیا ولایتونو امنیتي مسوولان وايي، په تېرو څو ورځو کې چې په رسمي ډول له افغانستانه د بهرنیو ځواکونو د وتلو لړۍ پیل شوې، ورسره هممهاله د طالبانو بریدونه هم ډېر شوي دي.
هغه شمېرې چې تر پرون ورځې له ۹ ولایتونو څخه سلاموطندار ته رسېدلي، ښيي چې له افغانستانه د بهرنیو ځواکونو د وتلو لړۍ په پیل سره وضیعت نور هم ترینګلی شوی دی.
طالبانو له افغانستانه د امریکايي ځواکونو د اېستلو په اړه د دغه هېواد له رسمي اعلان وروسته په هېواد کې بریدونو ته زور ورکړی دی.
د ولسمشر د ملي امنیت سلاکار نن په کابل کې د امنیتي سکتور له مشرتابه سره په ګډه خبري غونډه کې وویل چې طالبانو د بهرنیو ځواکونو د وتلو له اعلان سره سم خپلو بریدونه ډېر کړي، خو په وینا یې، دا ډله به هېڅکله د جګړې له لارې خپلې موخې ته ونه رسېږي.
سياِناِن پرون د سپینې ماڼۍ او د امریکا د څو دفاعي چارواکو له قوله راپور ورکړی چې له افغانستانه د امریکايي ځواکونو د وتلو لړۍ روانه ده.
دغه راز، د ناټو ځواکونو څو چارواکو د فرانسې له خبري اژانس سره په مرکه کې تایید کړې چې ناټو سازمان هم له افغانستانه د خپلو ځواکونو اېستلو لړۍ پیل کړې ده. د ناټو سازمان یوه چارواکي یاد اژانس ته ویلي چې د دغه سازمان متحدانو د اپرېل په نیمايي کې پرېکړه وکړه چې په افغانستان کې خپل ماموریت پای ته ورسوي او په وینا یې، له دغه هېواد څخه یې د ځواکونو اېستلو لړۍ پیل شوې ده.
په منځني ختیځ کې د امریکا د پوځ عمومي قوماندان کېنټ مکېنزي له افغانستانه د بهرنیو ځواکونو تر وتلو وروسته وضعیت په اړه د اندېښنې ښودلو ترڅنګ ویلي، افغان ځواکونه له افغانستانه د بهرنیو سرتېرو له وتلو وروسته هم ملاتړ ته اړتیا لري.
هغه دا څرګندونې پرون د امریکا د سنا پوځي خدماتو کمېټه کې کړې دي.
د امریکا ولسمشر جو بایډن تازه اعلان کړی چې د روان میلادي کال د سپټمبر میاشتې تر ۱۱مې پورې به خپل ځواکونه له افغانستانه وباسي. بایډن ټینګار کړی چې له افغانستانه یې د ځواکونو له وتلو وروسته به هم د دغه هېواد ملاتړ او مرستو ته دوام ورکړي.
د سیاسي چارو شنونکي وايي، امریکا په افغانستان کې خپل پوځې شتون پای ته رسوي، خو سیاسي هغه به یې دوامداره وي.
له هغه وروسته چې واشنګټن پوسټ ورځپاڼې د روان کال د سپټمبر میاشتې په یوولسمه له افغانستانه د امریکايي ځواکونو د وتلو په اړه د امریکا د ولسمشر جو بایډن د پرېکړې په اړه راپور خپور کړ، طالبانو ویلي، تر هغه چې بهرني ځواکونه له افغانستانه ونه وځي، دا ډله به په هېڅ هغې غونډه کې چې د افغانستان په اړه پهکې پرېکړه کېږي، ګډون ونه کړي.
د امریکا دفاع وزیر لویډ اسټین د دغه هېواد متحدانو ته ډاډ ورکوي چې متحده ایالات به په بیړه او نامنظم ډول له افغانستانه را ونه وځي.
د امریکا دفاع وزارت په یوه خبرپاڼه کې لیکلي چې اسټین پرون د ناټو د دفاع وزیرانو په غونډه کې ویلي چې هېواد یې له طالب ډلې سره د امریکا په هوکړه کې د شرایطو پر بشپړې ارزونې کار کوي، څو دواړه لوري ورته ژمن وو، که نه.
د ناټو سرمنشي ینس سټولټنبرګ د دغه سازمان د غونډې په څنډه کې ویلي، تر هغه چې په افغانستان کې تلپاتې او دوامداره سوله را نه شي، ناټو به یې ملاتړ ته دوام ورکړي.
ټاکل شوې د ناټو د غړیو هېوادونو د دفاع وزیرانو غونډه نن او سبا د بلجیم په پلازمېنه بروکسېل کې جوړه شي.
طالبانو له افغانستانه د شاوخوا دوو زرو امریکايي سرتېرو د وتلو له اعلان څو ساعته وروسته په کندهار کې د ځانګړې قطعې پر کنډک موټربم برید وکړ. په همدې حال کې د طالبانو نفوذي کسانو بېګاه د هرات په غوریان ولسوالي کې پر ولسي پاڅونوالو برید کړی چې له کبله یې ۱۲ پاڅونوال وژل شوي دي. په بلخ کې بیا ۸ طالبان وژل شوي او ۱۱ ټپیان دي.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
