د افغانستان د اسلامي امارت د کورنیو چارو وزارت د پاسپورټ عمومي ریاست اعلان کړی چې د ګڼې ګوڼې او د خلکو د ستونزو د مخنیوي په خاطر له دې وروسته د پاسپورټونو د وېش لړۍ یوازې د انلاین فورمې له لارې ترسره کېږي.
د اسلامي امارت د ویاند مرستیال انعام الله سمنګاني نن شپه پر خپل ټویټر پاڼه کې د پاسپورټ ریاست د سرپرست عالمګل حقاني له قوله لیکلي چې د دغه ریاست ویبپاڼه خلاصه ده او مراجعین کولای شي د پاسپورټ انلاین فورم د ویبسایټ له لارې ډکه کړي.
د سلاموطندار پښتو فېسبوکپاڼه وڅارئ
سمنګاني ټینګار کړی چې له دې وروسته غوښتنلیکونه او سفارشي اسنادونه نه مني او د پاسپورټ عمومي ریاست به یوازې هغو کسانو ته د پاسپورټ د وېش حکم ورکړي په انلاین ډول یې فورم ډک کړی وي.
ټاکل شوې دا بهیر سر له سبا پلي شي او له مراجعینو څخه غوښتل شوي چې د پالیسۍ سره سم چلند وکړي. تر دې مخکې د پاسپورټ عمومي ریاست د عریضو له مخې هم مراجعینو ته د پاسپورټ حکم ورکول چې دا کار پر دغه ریاست د ګڼېګونې لامل شوی و.
