د افغانستان د ژورنالستانو د ملي ټولنې مسوولانو نن کابل کې د یوې خبرې غونډې پرمهال وویل، د رسنیو مالکان او د رسنیو ملاتړي بنسټونه د خبریالانو له نوم څخه ناوړه ګټه اخلي او په دې نوم یوشمېر کسان له هیواده باسي.
د ژورنالستانو د ملي ټولنې مسوول مسرور لطفي له نړیوالو بنسټونو غواړي چې د رسنیو څښتنانو او د رسنیو ملاتړي بنسټونه چې د خبریالانو له نوم څخه ناوړه ګټه پورته کوي مخه دې ونیسي.
د سلاموطندار پښتو فېسبوکپاڼه وڅارئ
یوشمېر خبریالان هم په دې اړه د اندېښنې په څرګندولو سره وايي، د رسنیو مالکان او د رسنیو ملاتړي بنسټونه د خبریالانو په نوم خپل او خپلوان له هېواده څخه بهر اېستلي دي.
دوی وايي چې د توحیدي او مجیب خلوتګر په څېر د رسنیو مسوولانو لومړی په تېرو شلو کلونو کې د خبریالانو په نوم پروژې واخیستې او اوس یې د دوی په نوم خپل او خپلوان له افغانستان څخه بهر ووېستل.
له دې وړاندې هم خبریالانو د رسنیو پر مالکانو او ملاتړو بنسټونو له دې امله نیوکه کړې وه چې دوی د خبریالانو په نوم خپل او خپلوان له هېواد څخه اېستلې دي. همدا اوس ډېرشمېر خبریالان چې د لېږد پر شرایطو برابر دي، په افغانستان کې پاتې دي او په بېبرخلیک حالت کې ژوند کوي.
