بدخشان کې امنيتي سرچينې وايي، د سرحدي ځواکونو ۴ سرتېري چې له بهارک ولسوالۍ شکاشم ته پر لاره وو، «اغرده» کوتل کې د توپان او سړې هوا له کبله مړه شوي دي.
د ياد ولايت د امنيې قومندانۍ وياند ثناالله روحاني وايي، دغه ۴ سرتېري د سرحدي ځواکونو د څلورم کنډک اړوند وو چې زېباک ولسوالۍ کې يې دنده درلوده. نوموړی زياتوي، مړه شوي سرتېري خپلو کورونو ته تللي وو او کله چې جرم او بهارک ولسوالۍ نه بېرته دندو ته تلل، په لاره کې يخ وهلي دي.
محلي سرچينې وايي، دغه سرتېري په لاره کې ورک دي او توپان کې ګير شوي دي.
ثناالله روحاني وايي، دغه سرتېري له تېرې جمعې ورځې راهيسې ورک وو او نن د شهدا ولسوالۍ امنيتي ځواکونو او د سيمې اوسېدونکيو «اغرده» کوتل کې موندلي دي.
د نوموړي په وينا، د مړو شويو سرتېرو جسدونه تر واورو لاندې وو چې په ډېرې سختۍ يې له واورو راويستي دي.
د يادولو ده چې دوه ورځې وړاندې هم انجمن کوتل کې د بدخشان د لاجوردو کان د ساتنې قطعې يو قومندان له سړې هوا له کبله مړ شوی و.
