د کډوالو په چارو کې د ملګروملتونو عالي کمېشنر فلیپو ګراندي ویلي، په نړۍ کې د لومړي ځل لپاره د جګړو، تاوتریخوالي، د بشري حقونو نقص او ځورونې له امله د کډوالو شمېر، له سل میلیونه اوښتی دی.
د ملګروملتونو عالي کمېشنر د ویجاړونکو نښتو مخنیوي، د تاوتریخوالي پای ته رسولو او د هغو مسایلو د حلولو غوښتنه کړې چې بېګناه کسان د خپلو کورونو پرېښودو ته اړ کوي.
د سلاموطندار پښتو فېسبوکپاڼه وڅارئ
د نوموړي په وینا، ایتوپیا، بورکینافاسو، میانمار، نایجیریا، افغانستان او کانگو هېوادونو کې اوږدمهاله نښتې او د تاوتریخوالي نوې څپه، روان میلادي کال کې د کډوالو د زیاتېدو لامل شوې ده.
د دې ترڅنګ د اوکراین جګړې روان میلادي کال ۸ میلیونه کسان دغه هېواد کې بېځایه کړي او شاوخوا ۶ میلیونه کسان یې نورو هېوادونو ته کډوال کړي دي.
د کډوالو په چارو کې د ملګروملتونو د عالي کمېشنرۍ د معلوماتو پربنسټ، د ۲۰۲۱ کال تر پایه ټوله نړۍ کې د کډوالو شمېر ۹۰ میلیونه کسانو ته رسېده.
