د سلاموطندار خبريال رومان کریمي وايي، بريدګر کابل پوهنتون ته دننه شوي او ډزې يې پيل کړې دي.
کريمي وايي، څو بريدګر حقوقو پوهنځي ته ننوتي او پر محصلانو يې ډزې کړي.
تر اوسه پورې د پېښې څرنګوالي او مرګژوبلې په اړه معلومات نشته.
امنيتي ځواکونه هڅه کوي چې د پوهنتون دننه څخه محصلان وژغوري.
د کورنيو چارو وزارت وياند طارق ارین وايي، کابل پوهنتون سره نږدې د ډزو غږونه اورېدل شوي دي او پوليس سيمه کې حضور لري. تصويرونه ښيي چې پوهنتون ته ځانګړي ځواکونه دننه شوي دي.
نن کابل پوهنتون کې د افغانستان او ایران د کتابونو ګډ نندارتون هم پرانیستل کېده چې یاده پېښه شوې.
د راپورونو پر بنسټ ترهګر د کابل پوهنتون شمالي دورازې څخه شرعياتو پوهنځي ته دننه شوي خو رسمي سرچينې په دې اړه څه نه وايي.
طالبانو ويلي چې دا بريد دوی کار نه دی.
