د پاکستان لومړی وزیر قطر ته ورسېد
د پاکستان لومړی وزیر شهباز شریف سعودي عربستان له سفر وروسته قطر ته رسېدلی او هلته به د قطر له امیر سره دوهاړخیزه لیدنه وکړي.
د پاکستان لومړی وزیر شهباز شریف سعودي عربستان له سفر وروسته قطر ته رسېدلی او هلته به د قطر له امیر سره دوهاړخیزه لیدنه وکړي.
د لبنان حزبالله ډله وايي چې د اسراییلو د پوځ ځینې پوستې یې د بېپيلوټه الوتکو (ډرونونو) په وسیله په نښه کړې دي.
دغه ډلې په یوې خبرپاڼه کې چې د ټلګرام له لارې خپره شوې، ویلي، د شمالي ښار «نهاریا» په شاوخوا سیمو کې یې د اسراییلو د پوځ پر ضد دوه بریدونه کړي دي.
د اوکراین چارواکي وايي چې د روسیې د تازه بریدونو پرمهال د دغه هېواد په بېلابېلو سیمو کې لږترلږه ۱۳ کسان وژل شوي او لسګونه نور ټپیان دي.
رویټرز خبري اژانس نن پنجشنبه(اپرېل ۱۶مه) راپور ورکړی چې روسیې تېر ماښام د اوکراین پلازمېنه کییف او نور ښارونه د توغندیو او بېپيلوټه الوتکو په وسیله په نښه کړي دي.
د اسراییلو «۱۲چینل» په نوم تلویزیوني شبکې راپور ورکړی چې نن سهار شاوخوا ۲۰ توغندي د لبنان له سوېل څخه د اسراییلو شمالي سیمې، جلیل (ګالیلي) ته توغول شوي دي.
د امریکا مرکزي قومنداني (سنټکام) ویلي چې د ایران پر بندرونو لګول شوی بندیز «په بې پرې ډول د ټولو هغو کښتیو پر وړاندې عملي کېږي چې د ایران ساحلي سیمو یا بندرونو ته داخلېږي یا ترې وځي.»
پر غزې تړانکې د اسراییلي ځواکونو د تازه هوايي برید له امله د وژل شویو کسانو شمېر پنځو ته لوړ شوی دی.
د فلسطین رسمي خبري اژانس (وفا) راپور ورکړی چې د غزې په شمال کې د الشاطي کډوالو پر کمپ د اسراییلو د هوايي برید له امله د وژل شویو کسانو شمېر پنځو ته لوړ شوی دی.
د امریکا د خزانې وزیر، سکات بسنت ویلي چې چین به د ایران نفت ترلاسه نهکړای شي او واشنګټن هڅه کوي د ایران د نفتو د لېږد مخه ونیسي.
بسنت په واشنګټن کې یوې ناستې ته ویلي چې چین کولای شي نفت وارد کړي، خو د ایران نفت نهشي ترلاسه کولای. هغه ټینګار وکړ چې امریکا به داسې اقدامات وکړي چې د ایران نفت نړیوالو بازارونو، په ځانګړي ډول چین ته، ونهرسېږي.
د ملګروملتونو سرمنشي انتونیو ګوترېش ویلي چې د امریکا او ایران ترمنځ د مذاکراتو د دویم پړاو د بیاپیل احتمال «ډېر زیات» دی.
ګوټرېش سهشنبه، اپرېل ۱۴مه، خبریالانو ته وویل، هغه نښې نښانې چې د ملګروملتونو په واک کې دي، ښيي چې د ایران د جګړې د پای ته رسولو لپاره د خبرو اترو بیا پیل ډېر ممکن دی.
د ایټالیا حکومت اعلان کړی چې له اسراییلو سره د دفاعي همکارۍ د تړون د اتومات تمدید بهیر یې ځنډولی دی. دا پرېکړه د منځني ختیځ د وروستیو تحولاتو په رڼا کې د دواړو دودیزو متحدینو ترمنځ د اړیکو د بدلون نښه بلل کېږي.
د اسراییلو پوځ اعلان کړی چې یو سرتېری یې له حزبالله سره په نښتو کې وژل شوی او درې نور ټپیان دي.
د اسراییل پوځ نن سهشنبه (اپرېل ۱۴مه) په یوې خبرپاڼه کې ویلي چې دغه سرتېري د لبنان سوېل کې د جګړې پرمهال وژل شوی او ټپیان شوي دي.
د اسوشیټېډپرېس خبري اژانس راپور ورکړی چې پاکستان وړاندیز کړی، څو د امریکا او ایران ترمنځ د خبرو دویم پړاو دې په پلازمېنه اسلاماباد کې ترسره شي.
د روسیې د بهرنیو چارو وزیر د سرګي لاوروف د منځني ختیځ د وروستیو تحولاتو په اړه د خبرو لپاره چین ته تللی دی.
روسي رسنیو نن سهشنبه اپرېل ۱۴مه، راپور ورکړی چې لاوروف په پلازمېنه بیجینګ کې د چین له بهرنیو چارو وزیر وانګ یی سره لیدلي دي. دواړه مشران به د دوه اړخیزو اړیکو ترڅنګ پر مهمو نړیوالو موضوعاتو هم خبرې وکړي.
د اسراییلو د ملي امنیت وزیر ایتامار بنګوېر په بیتالمقدس کې د الاقصی جومات انګړ ته تللی چې دې کار یې د فلسطینیانو او اردن غبرګونونه راپارولي دي.
نوموړي د لیدنې پرمهال ویلي چې غواړي یهودي عبادت کوونکو ته لازیات لاسرسی برابر کړي.
د یاد هېواد حکومت نن دوشنبه، اپرېل ۱۳مه، په یوې خبرپاڼه کې ویلي چې ډګر جنراله سوزن کویل چې اوس مهال د ګډو وړتیاوو مشره ده، د جولای له میاشتې څخه د پوځ د مشرې په توګه دنده پیل کړي. هغه به د ډګر جنرال سایمن سټوارټ ځای ونیسي.
د استرالیا لومړي وزیر انتوني البانیزي ویلي: «له جولای څخه به موږ د استرالیا د پوځ د ۱۲۵کلن تاریخ په اوږدو کې د لومړي ځل لپاره یوه ښځینه د پوځ مشره ولرو.»
د امریکا ولسمشر ډونالډ ټرمپ وايي، که ایران د خبرو مېز ته بېرته راګرځي او که نه، دی یې، پروا نهلري.
ټرمپ دغه څرګندونې د مریلینډ ایالت په یوه پوځي اډه کې له خبریالانو سره د خبرو پرمهال وکړې.
نوموړي وویل چې له ایران سره اوربند، چې ټاکل شوې د اپرېل تر ۲۲ پورې دوام وکړي، «ښه روان دی» او تر اوسه ټینګ پاتې دی.
د اسراییلو لومړی وزیر بنیامین نتنیاهو وايي چې له لبنان سره د «رېښتینې سولې» د ترلاسه کولو لپاره هڅه کوي.
نتنیاهو ویلي چې ایران او د هغه متحدین «د بقا لپاره جګړه کوي» او وروستیو جګړو د تهران اټومي او توغندیز پروګرامونه سخت زیانمن کړي دي.