د افغانستان بانک د ډالرو پر وړاندې د افغانیو د ارزښت ساتلو په موخه، سبا دوشنبه ۱۱ میلیونه ډالر بازار ته د لیلام په توګه وړاندې کوي.
د افغانستان بانک نن یکشنبه د تلې درېیمه پر خپله ټوېټرپاڼه له ټولو صرافانو او سوداګریزو بانکونو غوښتنه کړې چې په دغه داوطلبۍ کې ګډون وکړي.
د سلاموطندار پښتو فېسبوکپاڼه وڅارئ
په ورته مهال د افغانستان بانک ویلي چې د لیلام ګټونکی باید خپلې پیسې په ټاکلې موده کې په نغدي او یا هم د حوالې له لارې بانک ته وروسپاري.
دا په تېرو څو اوونیو کې دویم ځل دی چې د افغانستان بانک ډالر لیلاموي. له دې وړاندې تېره اوونۍ هم د افغانستان بانک د ډالرو پر وړاندې د افغانۍ ارزښت ساتلو لپاره ۱۲ میلیونه امریکايي ډالر لیلام کړي وو.
دا په داسې مهال ده چې د معلوماتو له مخې، نن د کابل سرای شهزاده کې یو امریکايي ډالر په «۸۸.۴۰» افغانۍ تبادله کېده.
