د سره صلیب نړېوالې کمېټې د یوه رپوټ په خپرولو سره ویلي، افغانستان کې روغتیايي خدمتونو ته لاسرسی لا هم د افغانانو لویه اندېښنه ده. د یاد بنسټ، په وینا، په زرګونه روغتیايي مرکزونه افغانستان کې تړل شوي او یاهم فعالیت نه لري.
سره صلیب زیاته کړې چې افغانان نشي کولای، خصوصي روغتیايي مرکزونو کې د درملنې لګښت ورکړي او نه هم ګاونډیو هېوادونو ته سفر کولای شي.
د سلاموطندار پښتو فېسبوکپاڼه وڅارئ
په رپوټ کې ویل شوي چې ګڼشمېر ناروغان د درملنې لپاره اوږده سفرونه کوي، څو د ځان یا د خپل ناروغ درملنه وکړي.
په همدې حال کې د ناروغانو کورنۍ نشي کولای، د درملنې او درملو لګښت ورکړي او ځينو برخو کې له روغتیايي مرکزونو څخه ناروغان له درملنې پرته رخصت کېږي.
سره صلیب همدراز ټينګار کړی چې افغانستان کې د کوویډ۱۹ واکسین ته د خلکو لاسرسی هم کم شوی دی. یاد بنسټ د روغتیا نړیوال سازمان د رپوټ پراساس ویلي، تراوسه شاوخوا ۱۰سلنه افغانانو واکسین ترلاسه کړی دی.
بلخوا بانکي او د نغدو پیسو ناورین افغانستان کې پر روغتیايي نظام ناوړه اغېزې کړې دي او افغانان نشي کولای، خپلې اړتیاوې برابرې کړي.
د سره صلیب نړیوالې کمېټې ټينګار کړی چې د افغانانو د ژغورنې او روغتیايي خدمتونو ته د بندیزونو لرې کولو په برخه کې خپلې هڅې جاري ساتلي او افغاستان کې د ۲۸ روغتونونو ملاتړي کوي.
سلاموطندار پر ټویټر هم وڅارئ
له دې وړاندې هم سره صلیب خبرداری ورکړی و چې مرستندویه سازمانونه په افغانستان کې د انساني ناورین د مخنیوي توان نه لري. یادې کمېټې له نړیوالې ټولنې غوښتي و چې له افغانانو سره مرستې وکړي.
