په کاپیسا کې امنیتي مسوولان وايي چې پر موټرسایکل سپرو کسانو په ډزو کې دوه پولیسې ټپیانې شوې دي.
د کاپیسا د امنیې قومانداني د رسنیو دفتر مسوول عبدالشایق شورش سلاموطندار ته ویلي چې پر موټرسایکل سپرو کسانو نن سهار شاوخوا اته نیمې بجې پر یوې رېکشا چې دغه دوه پولیسې پهکې سپرې وې، ډزې کړې دي.
د نوموړي په وینا، دا پېښه د دغه ولایت د دویمې حصې ولسوالي په اړوند سیمه کې شوې ده.
د نوموړي د معلوماتو پر بنسټ، د دغو دوو ښځو د کاپیسا په امنیه قومانداني کې کار کاوه.
د کاپیسا د عامې روغتیا رییس محمد شعیب دانش وايي چې د یادو ښځو له ډلې یوه یې امیندواره ده.
هغه ویلي، ډاکټران هڅه کوي چې د یادې ښځې ماشوم وژغوري.
د کاپیسا پولیس وايي د پېښې په اړه یې څېړنې پیل کړې دي.
تر اوسه کوم چا یا ډلې د دغه برید مسوولیت نه دی منلی.
