د ملګروملتونو سیاسي استازولۍ یا یوناما نن سهار پر ټوېټر ویلي، ټولې خواوې دې روانې نښتې او تاوتریخوالی ودروي او د جګړې سولهییز حل لپاره دې هڅې زیاتې کړي.
یوناما د هلمند جګړو ته په اشارې ويلي چې يادو جګړو کې زرګونه ملکیان د خپلو کورونو پرېښودو ته اړ شوي.
د دوی لومړني راپورونه ښيي چې دغو جګړو کې ملکیانو په ځانګړې توګه ښځو او ماشومانو ته مرګژوبله اوښتې ده.
د ملګروملتونو سیاسي استازولۍ زیاته کړې چې تاوتریخوالی یوازې د افغانانو لپاره لا ډېرې بدبختۍ رامنځته کوي او دوحه کې د سولې پیل شوې خبرې چې یو تاریخي فرصت دی، کمزوری کوي.
طالبانو د تېرې يکشنبې په ورځ د هلمند مرکز لښکرګاه ښار پر یو شمېر سیمو بريدونه وکړل.
همدارنګه، د ملي دفاع سرپرست وزیر اسدالله خالد هم د هلمند امنیتي حالت ارزونې په موخه دې ولایت ته تللی.
د هلمند د والي ویاند عمر ځواک وايي، په دې نښتو کې ۷ ملکيان وژل شوي او ۲۳ نور ټپيان دي.
د طالبانو په يادو بريدونو کې شاوخوا ۵۰۰۰ کورنۍ هم بېځايه شوې دي.
