د هلمند د والي ویاند عمر ځواک وايي، طالبانو د هلمند ـ کندهار «دوهلارې» سیمه کې د دواړو ولایتونو لپاره د برېښنا پر لوی سبسټېشن برید کړی چې تخنیکي توکي يې ځان سره وړي، ځینې يې تخریب کړي او د دې سبسټېشن د ساتونکيو ترڅنګ يې دوه انجینران هم ځان سره بيولي دي.
د هلمند برېښنا ریيس وحیدالله علیزی هم وايي، د سبسټېشن تخنیکي توکي چور شوي چې د له منځه وړلو مخنیوي په اړه يې ځايي مسوولان او د کندهار چارواکي هم په جریان کې کړي دي.
ویل کېږي، د سبسټېشن د زیاتو برخو له منځه تلو له کبله د هلمند او کندهار برېښنا هم پرې شوې ده.
طالبانو تر اوسه پورې په دې اړه څه نه دي ويلي.
له دې سره د کورنیو چارو وزارت وايي، هلمند کې د طالبانو پر وړاندې د افغان ځواکونو عملیاتو کې ۷۱ وسلهوال طالبان وژل شوي.
د ياد وزارت ویاند طارق ارین ویلي، افغان ځواکونو د هلمند ـ کندهار پر لویهلار، مرکز لښکرګاه ته نږدې سیمو، ناوې، نادعلي او نهرسراج ولسوالیو کې د طالبانو بریدونه پر وړاندې عملیات پیل کړي دي.
نوموړي وويل، عملیاتو کې تر دامهاله ۷۱ طالبان وژل شوي او ځينې هم ټپیان دي.
ځايي چارواکي وايي، تېرې ورځې راهیسې د مرکز لښکرګاه ښار څلورمه امنیتي حوزه، د نادعلي ولسوالۍ ځینې سیمې او د کندهار ـ هلمند پر لاره ګڼ شمېر امنیتي پوستې د طالبانو لاس ته سقوط شوي چې ډېر ژر به بېرته ونیول شي.
د هلمند والي محمد یاسین وویل، تازهدمي ځواکونه ور رسېدلي او د لاسه وتلو سیمو بېرته نیولو لپاره به پیل شوو عملیاتو کې ګډون وکړي.
همداراز سیمه کې اوس هم د افغان ځواکونو عملیات او جګړه دوام لري چې له کبله یې سلګونه کورنۍ د خپلو سیمو پرېښودو ته اړې شوي او لښکرګاه ښار ته يې کډې کړې دي.