اوکراین وايي چې د روسیې ضد بریدونو کې یې د دغه هېواد په سوېل ختیځ کې له روسي ځواکونو څخه څلور کلي بېرته نیولي دي.
اوکراین په سوېل او ختیځ کې د روسیې له لوري د نیول شویو سیمو بېرته ترلاسه کولو لپاره پراخ تعرضي بریدونه پیل کړي دي.
د سلاموطندار پښتو فېسبوکپاڼه وڅارئ
اوکراین پرون یکشنبه اعلان وکړ چې د روسیې ضد بریدونو کې یې دونېڅک کې بلاهوداټنه، نسکوچنه او ماکاریوکا کلي چې ژاپورژیا ته نږدې دي، بېرته نیولي دي.
روسیې بیا تېره اوونۍ ویلي و چې د اوکراین له لوري پیل شوي تعرضي بریدونه یې شنډ کړي دي. روسیې د دوی ضد بریدونه ناکامه وبلل او د هغو ویجاړو شویو امریکايي او الماني ټانکونو او وسایطو تصویرونه یې هم خپاره کړل چې د دوی ځواکونو لهمنځه وړي وو.
په ورته مهال د اوکراین پوځ ویلي چې د تېرو ۲۴ساعتونو پر مهال د لوهانسک په باخموت، اودیوکا، مارینکا او نورو سیمو کې له روسي ځواکونو سره ۲۵ نښتې رامنځته شوي دي.
د یاد هېواد پوځ همداراز ټینګار کړی چې د اوکراین په باخموت شاوخوا سیمو کې د روسیې ضد بریدونو پایله کې روسیي ځواکونه ۷۰۰ مټره شاتګ ته اړ کړي دي.