د میدان وردګ ولایت چارواکي وايي، د کابل-کندهار پر لویې لارې د دغه ولایت د مرکز میدانښار اړوند په «کوتل» سیمه کې د یوه ۴۰۴ ډوله موټر او سراچې ترمنځ ټکر شوی او له کبله یې درې کسان مړه شوي دي.
د میدان وردګ ولایت د عامې روغتیا رییس ډاکټر زرک ځیرک سلاموطندار راډیو ته وویل چې پېښه پرون مازدیګر مهال شوې ده. د نوموړي په وینا، یاده ټرافیکي پېښه د موټرچلوونکو د بېغورۍ او بېاحتیاطۍ له کبله شوې ده.
د میدان وردګ ولایت د ټرافیکو ادارې د معلوماتو پر بنسټ، په تېرو لسو میاشتو کې د کابل-غزني پر لویې لارې له سلو ډېرې ټرافیکي پېښې شوي او له امله یې لسګونو کسانو ته مرګژوبله هم اوښتې ده.
