د افغانستان په چارو کې د امریکا ځانګړي استازي دغه هېواد کې د داعش خراسان ډلې د کمزوري کولو برخه کې د اسلامي امارت د حکومت هڅې ستایلي دي.
توماس وېسټ دغه څرګندونې پرون سهشنبه د اګسټ ۱۲مه امریکا کې د اسټیمسون مرکز کې د وینا پر مهال کړې دي.
د سلاموطندار پښتو فېسبوکپاڼه وڅارئ
د افغانستان په چارو کې د امریکا ځانګړي استازي همداراز د تېرو دوو کلونو پر مهال د ا.ا له لوري د داعش خراسان څانګې د اتو قومندانانو او د یادې ډلې د بریدونو مخنیوي یادونه کړې او هغه یې ستایلي دي.
نوموړي وویل: «نه غواړم چې د داعش خراسان څانګې ګواښونو مخنیوي برخه کې د اسلامي امارت د هڅو ډېره ستاینه وکړم، خو د پخوا په پرتله اوس افغانستان کې د داعش بریدونه نه دي.»
په همدې حال کې د تېرې جمعې ورځې پر مهال د امریکا دوو استخباراتي چارواکو سياېناېن شبکې ته ویلي چې القاعدې افغانستان کې د بیا راژوندي کېدو توان له لاسه ورکړی دی.
امریکا داسې مهال افغانستان کې د ترهګرو ډلو د فعالیتونو او بریدونو د مهار او مخنیوي خبره کوي چې یوشمېر هېوادونه لاهم دې برخه کې اندېښنه لري.
د یادو اندېښنو په لړ کې د شانګهای همکاریو سازمان غړیو هېوادونو قزاقستان کې د یوې ناستې پر مهال افغانستان کې د القاعده او داعش ډلې شتون په اړه اندېښنه ښودلې.
د یادو هېوادونو اندېښنو ته په غبرګون کې د اسلامي امارت د ویاند مرستیال بلال کریمي سلاموطندار ته ویلي، افغانستان کې د ترهګریزو ګواښونو په اړه د شانګهای همکاریو سازمان د غړیو هېوادونو اندېښنې بېځایه دي.
په ورته مهال د امنیتي چارو کارپوه صادق شینواري سلاموطندار ته وویل چې هېوادونه باید افغانستان کې د ترهګرۍ په اړه اندېښنو لهمنځه وړو برخه کې همکاري او همغږي وکړي.
نوموړي وویل: «د دې لپاره یادو اندېښنو ته د پای ټکی کېښودل شي، د امریکا په ګډون د سیمې هېوادونه اسلامي امارت سره دې ناسته وکړي او یا دې دغه هېوادونه په ګډه یو میکانیزم جوړ کړي.»
واک ته د اسلامي امارت له رسېدو سره هممهاله ګاونډیو او د سیمو هېوادونو په وار وار افغانستان کې د ترهګرۍ په اړه اندېښنه ښودلې، خو ا.ا بیا تل ویلي، اجازه نه ورکوي چې افغان خاوره د بل هېواد پر ضد وکارول شي.
