د سره صلیب نړیوالې کمېټې د سهشنبې په ورځ له افغان سرې میاشتې ټولنې سره د شپاړلسو امبولانسونو مرسته وکړه. د سره صلیب نړیوالې کمېټې مسوولان په افغانستان کې د خپلو مرستو پر دوام ټینګار کوي او وايي، دا کمېټه د طبیعي پېښو پر مهال د خلکو ستونزو د حل لپاره لازمې هڅې کوي.
په افغانستان کې د سره صلیب نړیوالې کمېټې عملیاتي مرستیال ادرین زمیرمن وايي، ټاکل شوې په نږدې راتلونکې کې د افغان سرې میاشتې ټولنې ته دوهویشت نور امبولانسونه هم ورکړي.
هغه زیاتوي: «زموږ همکارۍ او ګډون دوام لري. موږ هڅه کوو چې د طبیعي پېښو د قربانیانو وضعیت ته د رسېدو برخه کې ځوابویوونکي واوسو. موږ له افغان سرې میاشتې ټولنې سره خپلو مرستو ته دوام ورکوو.»
په ورته وخت کې د افغان سرې میاشتې ټولنې مسوولان وايي، د دغو شپاړلسو امبولانسونو ټولیز ارزښت څه باندې دوه میلیونه افغانۍ دی.
د افغان سرې میاشتې ټولنې رییس مطېعالله خالص وايي، یاد امبولانسونه به خلکو ته د روغتیايي خدمتونو رسولو په موخه لرې پرتو سیمو ته ولېږي.
هغه له نړیوالو بنسټونو غواړي چې له افغانانو سره خپلو مرستو ته دوام ورکړي او په وینا یې: «موږ له ټولو نړیوالو بنسټونو مننه کوو چې خپلو مرستو ته دوام ورکوي. د خلکو اړتیاوې بېخي زیاتې دي؛ له هېوادونو غواړو چې خپلې مرستې زیاتې او دوامداره کړي.»
سلاموطندار پر ټویټر هم وڅارئ
د یادونې ده چې د هېواد د لرې پرتو سیمو اوسېدونکي لازمو روغتیايي خدمتونو ته لاسرسی نه لري او ډېری ناروغان د امبولانسونو نهشتون له کبله روغتونونو ته پر لارې ژوند له لاسه ورکوي.
