د خوست امنیتي مسوولان وايي چې د دغه ولایت په اړوند سیمه کې د یوه ملا امام په کور کې دننه د چاودنې له کبله دوه نجونې وژل شوي او دوه نور ماشومان ټپیان شوي دي.
پېښه نن سهار سهشنبه د غويي ۲۶مه د یاد ولایت د اسماعیلخېلو مندوزیو ولسوالي په بهرامخېلو کلي کې رامنځته شوې ده.
د سلاموطندار پښتو فېسبوکپاڼه وڅارئ
د خوست د امنیې قومنداني مطبوعاتي واند مستغفر ګربز سلاموطندار ته ویلي چې تراوسه د چاودنې څرنګوالی نه دی معلوم او دوی یې په اړه پلټنې پیل کړي دي.
د نوموړي په وینا، یاده پېښه د «ملا امام مفتي فاروق» په کور کې رامنځته شوې چې پر مهال د نوموړي دوه کوچنۍ لورګانې وژل شوي او دوه نور ماشومان یې ټپیان دي. په چاودنه کې مفتي فاروق ته زیان نه دی رسېدلی.
د خوست د امنیې قومنداني مطبوعاتي ویاند همداراز زیاته کړې چې امنیتي ځواکونه د پېښې ځای ته رسېدلي او د چاودنې په تړاو یې خپلې څېړنې پیل کړي دي.