د امریکا په نیویارک کې یوې محکمې د سپټمبر ۱۱مې پېښې د قربانیانو کورنیو ته د افغانستان بانک د کنګل کړل شوې شتمني څخه د ۳.۵ میلیارډ ډالرو د ورکړې غوښتنه رد کړې ده.
د امریکا په منهټن کې قاضي جورج دنیلز ویلي چې د دغه هېواد د قانون له مخې، د افغانستان مخکینی حکومت او خلک د سپټمبر۱۱مې بریدونو کې د اسلامي امارت د مسوولیت بیه باید پرې نه کړي.
دنیلز زیاته کړې چې د یادو قربانیانو کورنیو ته د افغانستان د شتمني یوه برخه ورکول به په دې معني وي چې اسلامي امارت یو قانوني حکومت دی او په وینا یې، کوم چې امریکا یې په رسمیت نه پېژني.
واک ته د اسلامي امارت تر رسېدو وروسته د افغانستان بانک اووه میلیارډ ډالر د ۱۴۰۰ کال د زمري په ۲۴مه د نیویارک په یوه بانک کې کنګل کړل شوې دي. له دې وروسته د ۲۰۰۱ کال د سپټمبر ۱۱مې پېښې د قربانیانو کورنۍ له یادې شتمني د غرامت غوښتنه وکړه.
د امریکا ولسمشر جو بایډن په یوه فرمان کې دغه شتمني نیمايي د افغانستان خلکو سره د مرستې لپاره ځانګړې کړه او نیمه یې د سپټمبر ۱۱مې پېښې د قربانیانو کورنیو حقوقي دعوا ته وړاندې کړه.
جورج دنیلز په خپل حکم کې ویلي چې د قربانیانو کورنۍ د غرامت غوښتنه کولای شي، «خو دوی نشي کولای چې دا کار د افغانستان بانک له بودیجې وکړي.»
سلاموطندار پر ټویټر هم وڅارئ
ملګروملتونو کې د افغانستان دایمي استازي نصیراحمد فایق له دغه حکم هرکلی کړی دی. نوموړي پر خپله ټوېټرپاڼه لیکلي: «خوشحاله یم چې له یوه کال هڅو وروسته، زموږ ټیم د افغانستان د کنګل شوې شتمني د ۳.۵ میلیارډ ډالرو د ساتنې دعوا کې بریالی شو.»
