افغانستان کې د بشري حقونو د وضعیت څېړنې لپاره د ملګرو ملتونو ځانګړي رپورټر ریچارډ بنېټ ویلي، دغه هېواد کې دې پر ملکیانو بریدونه ودرول شي.
نوموړي پرون پر خپله ټویټرپاڼه لیکلي، په مزارشریف کې د «سهدکان» جومات څخه یې لیدنه کړې ده. پر دغه جومات نږدې یوه میاشت وړاندې مرګونی برید شوی و.
د سلاموطندار پښتو فېسبوکپاڼه وڅارئ
د ملګرو ملتونو ځانګړي رپورټر د یادې پېښې د قربانیانو له کورنیو سره خپله خواخوږي شریکه کړې او دا برید یې د هزاره لمونځ کوونکو پر وړاندې تاوتریخوالی او بوږنوونکې پېښه یاده کړې ده.
نوموړي ټينګار کړی چې پر ملکیانو باید بریدونه ودرول شي او عاملان یې عدالت ته راکاږل شي.
د مزارشریف د روضې شمال ته پر «سهدکان» جومات برید کې څه باندې ۳۰ کسان وژل شوي وو او له ۸۰ ډېر ټپیان شوي وو. ویل کېږي دغه جومات د شیعهګانو اړوند و.
