یوشمېر ښاریان او صرافان د هېواد په بازارونو کې د زړو افغاني بانکنوټونو له زیاتوالي څخه شکایت کوي.
د دوی په وینا، د هرې ورځې په تېرېدو سره په بازارونو کې زاړه بانکنوټونه زیاتېږي چې صرافانو او عامو خلکو ته یې زیانونه رسولي دي.
د سلاموطندار پښتو فېسبوکپاڼه وڅارئ
یوشمېر ښاریان سلاموطندار سره په خبرو کې وايي چې دغه زاړه بانکنوټونه په هېواد کې د بانکونو له لوري خلکو ته ورکړل شوي، خو اوس یې له خلکو بېرته نه اخلي.
دوی له اسلامي امارت څخه غواړي چې د هېواد له بازارونو څخه زاړه افغاني بانکنوټونه راټول کړي او پر ځای یې نوي بانکنوټونه بازار ته وړاندې کړي.
په همدې حال کې د هېواد په بازارونو کې د زړو پیسو زیاتوالي یوشمېر صرافان هم زیانمن کړي دي. دوی وايي چې له پېردونکو سره د زړو بانکنوټونو د راکړې ورکړې پرمهال له ستونزو سره مخ دي او له دوی څخه څوک زړې پیسې نه اخلي.
د صرافانو په وینا، ملي بانک او د افغانستان بانک په دې وروستیو کې له صرافانو څخه د زړو پیسو د اخیستلو بهیر درولی دی. په همدې حال کې دوی له بانکونو غواړي چې له صرافانو څخه زاړه بانکنوټونه واخلي.
وموغوښتل چې په دې اړه د افغانستان بانک نظر هم له ځان سره ولرو، خو د درې پرلهپیسې ورځو په ترڅ کې له هڅو سره سره بیا هم بریالي نهشو.
د یادونې وړ ده چې واک ته د اسلامي امارت له رسېدو وروسته، د هېواد په بازارونو کې زاړه بانکنوټونه زیات شوي، خو تراوسه یې د حل په اړه پرېکړه نه ده شوې.
