بغلان کې روغتیايي مسوولان وايي چې د دغه ولایت د خنجان ولسوالي په سنګملخان سیمه کې د سالنګونو پر لویه لاره د ټرافیکي پېښې له کبله نهه کسان مړه او ۴۰ نور ټپیان شوي دي.
د پلخمري ښار د ولایتي روغتون مسوولان زیاتوي چې دغه روغتون ته له یادې ټرافیکي پېښې څخه نهه مړي او ۴۰ ټپیان وروړل شوي دي.
د پلخمري ولایتي روغتون رییس شاه ولي سلاموطندار ته ویلي چې بېګاه شپه ۱۱:۳۰ بجې یو«۵۸۰» ډوله موټر چې له کابل څخه بغلان ته روان و، د سنګملخان سیمې اړوند د سالنګونو پر لویه لاره له سړک څخه اوښتی چې په پایله کې یې نهه کسان مړه او ۴۰ ټپیان شوي.
د پلخمري ولایتي روغتون کې ډاکټرانو په دغه پېښه کې د دوو مسافرو روغتیايي وضعیت د اندېښنې وړ بللی دی.
د یادونې وړ ده چې د یادې پېښې ډېری ټپیان د بلخ، فاریاب او جوزجان ولایتونو اوسېدونکي دي. دا په داسې مهال دی چې له دې وړاندې هم په سالنګونو د ټرافیکي پېښو له امله یوشمېر کسان مړه او ټپیان شوي دي.
سلاموطندار پر ټوېټرپاڼه هم وڅارئ
د سالنګونو لویه لاره چې کابل او سوېلي ولایتونو له شمال سره نښلوي، د ژمي په موسم کې موټر چلوونکي له ګڼو ستونزو سره مخ وي او د سړک خرابوالی او د واورې اورښت بیا هغه څه دي چې وخت نا وخت یې له امله داسې پېښې رامنځته کېږي.
