د عامې روغتیا وزارت د روغتیايي کارکوونکو د هڅونې او ستاینې په موخه نن کابل کې د «ټولنې د روغتیايي کارکوونکو ملي ورځ» ونمانځله.
د روغتیايي کارکوونکو ملي ورځ هر کال په لرې پرتو سیمو کې خلکو ته د لومړنیو روغتیايي خدمتونو د وړاندې له امله د روغتیايي کارکوونکو ملاتړ او هڅونې په موخه نمانځل کېږي.
سرپُل کې روغتیايي کارکوونکی نورمحمد وايي چې کلیوالي سیمو کې خلکو ته د لومړنيو صحي خدمتونو او پوهاوي ورکولو په برخه کې کار کوي او د میاشتې ۱۰۰ افغانۍ ورکول کېږي چې ورته بسنه نه کوي.
نوموړي وویل: «اصلي مسوولیت مو د روغتیايي مسایلو تدریس دی. د معمولي ناروغیو درملنه. روغتونو ته د رجعت ورکولو سېسټم پیاوړتیا، ټولنه کې د کورنۍ تنظیم خدمتونو وړاندې کول او د واکسین تطبیق دی، خو بدل کې یې موږ ته د میاشتې سل افغانۍ معاش راکول کېږي چې بسنه نه کوي.»
په ورته مهال کندهار کې د روغتیا برخې یوه کارکوونکې مینه هم له خپل میاشتي عاید څخه شکایت لري. نوموړې سلاموطندار ته وویل چې د دغه ولایت لرو پرتو سیمو ته سفرونه کوي، څو خلکو ته روغتیايي خدمتونه وړاندې کړي، خو په بدل کې یې معاشونه خورا کم دي.
د مینې په وینا، د میاشتې یوازې ۲۰۰ افغانۍ ورکول کېږي چې اقتصادي ستونزو ته په کتو یې بسنه نه کوي.
د عامې روغتیا وزارت مسوولان هم تاییدوي چې د روغتیايي کارکوونکو فعالیتونو ته په پام د هغوی معاش کم دی. د دغه وزارت مرستیال حبیبالله اخندزاده وویل، د روغتیايي کارکوونکو د معاشونو زیاتولو لپاره هڅې کوي.
اخندزاده زیاته کړه چې دا مهال د هېواد د لرو پرتو سیمو په روغتیايي مرکزونو کې ۳۰زره کارکوونکي خلکو ته د خدمتونو پر وړاندې کولو بوخت دي چې ۵۰سلنه یې ښځې دي.
د نوموړي په وینا، د لرې پرتو سیمو ۱۲ زره او ۹۲۲ روغتیايي مرکزونو کې نږدې ۳۰ زره روغتیاپالان خلکو ته صحي خدمات وړاندې کوي.
سلاموطندار پر ټوېټرپاڼه هم وڅارئ
د عامې روغتیا وزارت مسوولان زیاتوي چې د روغتیايي کارکوونکو روزل او د هغوی ظرفیت لوړول چې د لرې پرتو سیمو اوسېدونکي له دې لارې لومړنیو خدماتو ته لاسرسی پیدا کوي، د عامې روغتیا وزارت له مهمو پروګرامونو څخه دي.
