په پوهنتونونو کې د نجونو د زدهکړو بندېدو په اړه د غبرګونونو پر دوام د سعودي عربستان د بهرنیو چارو وزارت ویلي چې د اسلامي امارت له دې پرېکړې خواشینی او حیران شوی دی.
دغه وزارت چهارشنبه د لیندۍ ۳مه په یوې خبرپاڼه کې له اسلامي امارت غوښتنه کړې چې خپله پرېکړه لغوه کړي او په وینا یې، په ټولو اسلامي هېوادونو کې دغه پرېکړه حیرانونکې ده.
د سعودي عربستان د بهرنیو چارو وزارت زدهکړې د ښځو مشروع حق بللی او ویلي یې دي چې د دغه حق ورکړه د افغانستان امنیت، ټيکاو او پراختیا سره مرسته کوي.
دا په داسې مهال دی چې د لوړو زدهکړو وزارت په تازهګۍ سره په یوه خپور کړي مکتوب کې د ټول هېواد په پوهنتونونو کې د نجونو لوړې زدهکړې ځنډولي دي.
دغه وزارت د روانې اوونۍ د سهشنبې پر ورځ په دې مکتوب کې دولتي او خصوصي پوهنتونونو ته سپارښتنه کړې چې د نجونو زدهکړې وځنډوي.
سلاموطندار پر ټویټر هم وڅارئ
په مکتوب کې لیکل شوي چې د نجونو د لوړو زدهکړو پرېکړه د اسلامي امارت د حکومت د کابینې په ناسته کې شوې ده. دغې پرېکړې تراوسه ګڼشمېر کورني او نړیوال غبرګونونه له ځان سره لرلي دي.
