هغه مکتوب چې سلاموطندار ترلاسه کړی، ښکاري چې د روان مالي کال ملي بودجه له کسر سره مخ ده او احتمال شته چې دغه کسر زیات شي. دغه مکتوب چې د روانې میاشتې په ۱۶مه نېټه د مالیې وزارت د سرپرست محمدخالد پاینده له لوري لاسلیک او د خزاینو عمومي ریاست او ټولو بودجوي ادارو ته لېږدول شوي، پکې راغلي چې ټول بودجوي واحدونه دې د دولت عادي او پراختیايي لګښتونو کې « سپما» وکړي.
د سلما بند د ساتنې کنډک قوماندان اللهمحمد همدرد وايي، طالبانو پرون مازدیګر شاوخوا پنځه بجې دغه بند په څو هاوانونو ویشتی دی. د نوموړي په وینا، یاد هاوانونه د بند په شاوخوا کې لګېدلي دي. اللهمحمد زیاتوي، طالبان اوس د سلما بند په شاوخوا سیمو کې ځای پر ځای شوي دي. د هرات په چشت ولسوالي کې یوه باوري محلي سرچینه وايي چې په تېرو څو ورځو کې د سلما بند ځینې امنیتي پوستې د طالبانو لاس ته لوېدلې دي.
د فاریاب د قیصار ولسوالي اوسېدونکی صفرمحمد بېګاه د دغه ولایت په مرکز میمنې ښار کې د بېوزلۍ او ناروغۍ له کبله په یوه څپره کې مړ شوی دی.
د صفرمحمد خپلوان سیدمامون وايي چې صفرمحمد یو کال مخکې د جګړې له کبله میمنې ته راغلی و او په یوه څپره کې یې ژوند کاوه.
د بهرنیو چارو وزارت مرستیال ویاند حامد تهذیب سلاموطندارته ویلي، تمه ده سبا د تاجکستان پلازمېنه دوشنبې کې د شانګهای سازمان د غړو هېوادونو د بهرنیو چارو وزیرانو ترمنځ غونډه جوړه شي.
ولسمشر محمداشرف غني نن د کانونو اوونۍ په غونډه کې وویل چې افغان دولت په هېواد کې د جګړې پای ته رسېدو لپاره د سولې طرحه وړاندې کړه او په خبره یې، هغوی چې سوله نه کوي، باغیان دي.
پېښو ته د رسېدو په چارو کې د دولت وزارت مسوولان وايي، په هېواد کې د وچکالۍ مهارولو لپاره له شپږ میلیارډه ډېرې افغانۍ پهکار دي، خو دغه اداره ورته یوازې یو میلیارډ بودیجه لري.
د هرات والي عبدالصبور قانع پرون په یوه خبري غونډه کې سلما بند ته د پېښو امنیتي ګواښونو د رد ترڅنګ، ډاډ ورکړ چې د دغه بند د ساتنې لپاره به ټول امکانات وکاروي.
هغه سلما بند ته د پېښو امنیتي ګواښونو خپرېدل د دښمن تبلیغات یاد کړل او په وینا یې، د یاد بند د ساتنې لپاره لازم ځواک شته او که نورو ځواکونو ته اړتیا پیدا کړي، ور وبه یې لېږي.
د هرات والي عبدالصبور قانع وايي چې د لا ښې همغږۍ او مدیریت لپاره یې د دغه ولایت د چشت ولسوالي په مرکز کې مېشت ځواکونه یې دویم ځای ته لېږدولي دي. هغه سلما بند ته پېښ ګواښونه نه مني او په وینا یې، دا د دولت د مخالفانو شایعات دي. نوموړی خلکو ته ډاډ ورکوي چې یاد بند خوندي دی او لازم ساتونکي لري، خو په خبره یې، که په دې برخه کې نورو سرتېرو ته اړتیا شوه، ور وبه یې لېږي.
د سلما بند د ساتنې کنډک قوماندان الله محمد همدرد وايي، طالب وسلهوالو نن سهار د یاد بند د ساتنې پر مرکز چې د هرات د چشت ولسوالي په لوېدیځ کې پروت دی، برید کړی دی.
د نوموړي په وینا، په دغه برید کې د سلما بند ۱۶ امنیتي ساتونکي وژل شوي او مرکز یې هم د طالبانو لاس ته ورغلی دی.
د افغانستان بانک په یوې خبرپاڼه کې ویلي چې د دغه بانګ یوشمېر کارکوونکي یې په جینوا سند کې پښتو ژبې ته د نه پام له امله له دندو ګوښه کړي دي.
نن په کابل کې د کرنې اوبو لګولو او مالدارۍ او کډوالو چارو او بېرته راستنېدونکو چارو وزارتونو کروندګرو ته د کوچنیو پورونو د ورکړې هوکړه لیک لاس لیک کړ.
د زړو یا دویم لاس توکو پلور په لویو ښارونو کې ښه بازار لري او ځینې وخت د ټولنې بېوزله کسان چې په پلورنځيو کې د اړتیا وړ توکي نه شي رانیولی، کولای شي چې هماغه جنس په نیمه بیه د زړو یا دویم لاس توکو له پلورنځیو څخه راونیسي.
د نړیوال بانک مدیره پلاوي پرون له افغانستان سره د نړیوالې پراختیا ادارې ۱۳۲ میلیونه ډالره وړیا مرسته تصویب کړې ده.
نړیوال بانک په یوه خبرپاڼه کې لیکلي چې یادې پیسې به د بنسټیزو اصلاحاتو پروسې د دوام، د دولتي ادارو د لګښتونو او مالي روڼتیا، د حکومتولۍ پیاوړتیا او د خصوصي پانګونې د هڅونې له لارې د افغانستان اقتصادي ودې ته د رسېدو په برخه کې ولګول شي.
د سرپل د ولایتي شورا غړی محمدحسین مجاهد زاده وایي، د جګړو او ناامنیو د پراخېدو له امله د سرپل-جوزجان لویې لارې د موټرو کرایه او د خوراکي او غیر خوراکي توکو بیې په کمساري توګه لوړې شوي دي.
نن د یوشمېر ترانسپورټي او باروړونکو شرکتونو مسوولانو په یوې اعتراضیه غونډه کې د ځمکني ټرانسپورټ د انسجام شورا پر لویو لارو کې د اخاذۍ پر اخیستلو تورونه کړه او وویل چې دغه شورا په ناقانونه توګه له موټر چلوونکو څخه پیسې اخلي.
یوشمېر مېرمنې په پکتیا ولایت کې له حکومت څخه د دوی لپاره د سوداګریز مارکېټ د جوړېد غوښتنه کوي. دغه مېرمنې وايي، ولسمشر محمد اشرف غني درې کاله وړاندې ورسره ژمنه کړې چې ګردېز ښار کې به د دوی لپاره یو سوداګريز مارکيټ جوړوي، خو د درېو کلونو په تېرېدو سره دغه ځانګړی مارکيټ نهدی جوړ شوی.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
