د پاکستان دولتي راډیو خبر ورکړی چې تر اوسه ۴۱۸ زره او ۹۸۰ ناقانونه افغان کډوال بېرته افغانستان ته لېږل شوي دي. د پاکستان راډیو نن (د لیندۍ اتلسمه، د شنبې ورځ) لیکلي چې یوازې پرون ۲۴۷۳ افغانان بېرته خپل هېواد ته استول شوي دي.
د دې رسنۍ په وینا، د افغانانو په ګډون، په پاکستان کې د مېشتو ناقانونه کسانو د اېستلو لړۍ روانه ده.
پاکستان په اکټوبر میاشت کې د ۱،۷ میلیونه افغانانو په ګډون، ناقانونه کډوالو ته ضربالاجل وټاکه، څو دغه هېواد پرېږدي او که په خپله خوښه ونه وځي، دوی به یې په زوره وباسي.
د پاکستان لنډمهالي سرپرست حکومت د نومبر په دویمه د هغو افغانانو د په زوره اېستلو لړۍ چې قانوني سندونه نه لري، پیل کړه.
