د زابل ځایې چارواکي وايي چې د بېپولې ډاکټرانو ټولنې د زابل ولایتي روغتون ته څېرمه د نري رنځ د تشخیص او درملنې مرکز پرانېستی او له دې وروسته به پر دې ناروغي د اخته کسانو درملنه همدلته کېږي.
زابل کې د بېپولې ډاکټرانو ټولنې مسوول ډاکټر مجیباحمد وايي، د دغه مرکز د جوړولو ترڅنګ، هڅه کوي چې په دغه ولایت کې پر خوارځواکۍ د اخته ماشومانو درملنه هم وکړي.
نوموړي له زابلیانو غوښتي چې پر خوارځواکۍ اخته ماشومان په نښه او دوی ته یې د درملنې لپاره ور وپېژني.
په همدې حال کې د زابل د عامې روغتیا رییس ډاکټر عبدالحکیم حکیمي وايي، د بېپولې ډاکټرانو ټولنې ورسره ژمنه کړې چې د نري رنځ ناروغي پر وړاندې د مبارزې په موخه به خپل روغتیايي خدمتونه د دغه ولایت ولسوالیو ته هم وغځوي.
بلهخوا یو دیني عالم حمدالله اخوندزاده په زابل کې پر نري رنځ د اخته کسانو د شمېر زیاتوالي په اړه اندېښنه وښوده او زیاته یې کړه چې دوی به دې برخه کې د بېپولې ډاکټرانو ټولنې سره همکاري وکړي.
د سلاموطندار پښتو فېسبوکپاڼه وڅارئ
د یادونې ده چې نری رنځ یا توبرکلوز هغه ناروغي ده چې د راپورونو پر بنسټ، هر کال یې له کبله زرګونه افغانان خپل ژوند له لاسه ورکوي.
