د پاکستان حکومت د پاکستان نړیوال هوايي شرکت (PIA) د خصوصي کولو تړون بشپړېدو اعلان کړي چې له مخې یې د دې شرکت ۷۵سلنه ونډه د ۱۳۵ میلیارد روپیو په بدل کې د ګډې سوداګریزې پر یوې ډلې یا کنسورشیم باندې وپلورله.
حکومتي چارواکو دا معامله یو تاریخي ګام بللی او ادعا کوي چې دا به د هېواد د مالي نظم او بازارمحوره اصلاحاتو پر لور د دولت ژمنتیا وښيي.
PIA له کلونو راهیسې د درنو مالي زیانونو او شاوخوا ۶۵۰ میلیارد روپیو زړو پورونو له امله د حکومت پر بودیجه بار بلل کېده.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
د دې تړون له مخې، زاړه پورونه له شرکت څخه جلا شوي، څو نوی مدیریت له نسبي پاک مالي توازن سره کار پیل کړي. حکومت وایي چې دا به د دوامداره مرستو او بیلاوټونو «ژغورنې مرستې» دور ته د پای ټکی کېږدي.
چارواکي دا هم ټینګار کوي چې د ونډو پلور د ژوندۍ خپرونې له لارې شوی چې موخه یې شفافیت او عامه باور زیاتول وو. د کنسورشیم لهخوا د بېړۍ پراخول، پانګونه او د کارکوونکو ساتنه هغه ژمنې دي چې د شرکت د بیا احیا لپاره وړاندې شوې دي.
سره له دې، شنونکي وایي چې اصلي ازموینه به د عملي پلي کېدو پر مهال وي. که څه هم دا معامله د اصلاحاتو لپاره یو مهم ګام بلل کېږي، خو دا به وخت وښيي چې ایا دا به رښتینی بدلون راولي که نه.؟
