د کډوالو او بېرته راستنېدونکو چارو وزارت وايي، په تېرو څلورو ورځو کې ۱۱ زره او ۹۹۷ افغان کډوال په زوره او خپله خوښه له ایران او پاکستان څخه هېواد ته را ستانه شوي دي.
د سلاموطندار پښتو فېسبوکپاڼه وڅارئ
دغه وزارت نن (د چنګاښ شپاړلسمه، د شنبې ورځ) پر اېکس لیکلي چې ۱۰ زره او ۶۴۵ افغان کډوال په نیمروز کې د ورېښمو پل او په هرات کې د اسلامکلا له لارې له ایران څخه هېواد ته را ستانه شوي دي.
یاد وزارت زیاته کړې چې ۱۳۵۲ نور افغان کډوال د سپینبولدک او تورخم له لارو له پاکستان څخه هېواد ته راغلي دي.
د کډوالو او بېرته راستنېدونکو چارو وزارت ویلي، یاد کسان له نوملیکنې وروسته د ملګرو ملتونو د کډوالو عالي کميسارۍ او د کډوالۍ نړیوال سازمن ته د مرستو لپاره ورپېژندل شوي دي.
د دغه وزارت د وروستیو شمېرو له مخې، په تېره یوه میاشت کې ۱۱۵ زره افغانان له ایران او پاکستان څخه افغانستان ته راغلي دي.
