د میدانورګ د طبیعي پېښو پر وړاندې د مبارزې ریاست مسوولان وایي، پرون سهشنبه د غبرګولي دویمه د سختو اورښتونو امله د دغه ولایت یوشمېر سیمو کې سېلابونه راوتلي چې د هستوګنیزو کورونو سربېره یې کرنیزو ځمکو ته هم زیانونه اړولي دي.
د میدانوردګ د طبیعي پېښو پر وړاندې د مبارزې رییس فیضالله جلالي سلاموطندار ته ویلي، د اورښتونو له کبله د دغه ولایت په مرکز او جلریز ولسوالي کې د هستوګنې ۳۰ کورونه ویجاړ شوي او شاوخوا ۲۰۰جریبه کرنیزه ځمکه هم لهمنځه تللې ده.
د سلاموطندار پښتو فېسبوکپاڼه وڅارئ
نوموړي همداراز ویلي چې پرونیو سېلابونو په نرخ، سیداباد، دایمیرداد او جغتو ولسوالیو کی هم زیانونه اړولي، خو تراوسه یې د زیانونو کره معلومات نه دي راټول شوي.
پرون سهشنبه غور کې هم د اورښتونو له امله سېلابونه راوتلي و چې پر مهال یې شپږو کسانو خپل ژوند له لاسه ورکړی دی.
د غور د والي ویاند عبدالواحد حماس (د غبرګولي دویمه، د سهشنبې ورځ) سلاموطندار ته ویلي و چې د فېروزکوه ښار د «مدرسې» سیمه کې د راغلیو سېلابونو له کبله درې ښځې او یوه کوچنۍ نجلۍ مړه شوې او یوه بله ښځه هم ورکه ده.
د نوموړي په وینا، د فېروزکوه تر څنګ، د غور د پسابند ولسوالي په کاکړي سیمه کې هم سېلاب راوتلی چې له کبله یې یو نارینه او یوه ښځه مړه شوي او لسګونه استوګنیز کورونه یې زیانمن کړي دي.
د فېروزکوه ښار د مدرسې سیمې یوه اوسېدونکی امانالله هم وايي چې په یاده سیمه کې د سېلاب راوتلو له کبله له ۲۰ ډېر استوګنیز کورونه ویجاړ شوي دي.
