د بادغیس ولایت محلي مسوولان وايي چې په لومړي ځل دغه ولایت کې ۲۵ زېږنتونونه جوړ او ګټې اخیستنې ته وسپارل شول.
د بادغیس د عامې روغتیا رییس محمداصف قانت سلاموطندار ته ویلي چې دغه زېږنتونونه په مرکز او ولسوالیو کې د غوره روغتیايي خدمتونو د وړاندې کولو په موخه جوړ شوي دي.
د سلاموطندار پښتو فېسبوکپاڼه وڅارئ
د دغه ولایت د عامې روغتیا رییس زیاتوي چې یاد زېږنتونونه د اوو میلیونه افغانیو په لګښت رغېدلي چې د ملګرو ملتونو د نفوسو صندوق له لوري ورکړل شوي دي.
د قانت په وینا، دغو زېږنتونونو کې به د مېندو زېږون کېږي او په رغېدو سره یې د دې ولایت د ډېری لرو پرتو سیمو کې د ښځو ستونزې هوارې شوې دي.
په ورته مهال د بادغیس د روغتیا مسوولان وايي چې په هر زېږنتون کې د مېندو او ماشومانو لپاره د روغتیايي خدمتونو د وړاندې کولو په موخه یوه قابله ګومارل شوې ده.
د بادغیس د روغتیايي مسوولانو په وینا، دغه زېږنتونونه کولای شي چې د مور او ماشوم د مړینې کچه راټيټه کړي.
