د کندهار محلي مسوولان وايي چې د دغه ولایت د سپینبولدک له لارې له پاکستان څخه په تېرو درېوو ورځو کې ۱۴۲ کورنۍ بېرته هېواد ته راستنې شوې دي.
د کندهار د والي ویاند حاجي عزیز سلاموطندار ته ویلي چې د روانې غويي میاشتې په ۲۳مه، ۲۴مه او ۲۵مه ۱۴۲ کورنۍ چې ټول ۸۶۰ کسان کېږي، بېرته هېواد ته راستانه شوي دي.
د سلاموطندار پښتو فېسبوکپاڼه وڅارئ
د نوموړي په وینا، دغه افغان کډوال د سپینبولدک د کډوالو او بېرته راستنېدونکو چارو امریت له لوري ثبت شوي دي.
د کندهار د والي ویاند زیاته کړې چې یاد افغان کډوال یې د مرستو ترلاسه کولو لپاره «UNHCR» او نورو مرستندویه سازمانو ته ورپېژندلي دي.
دغه افغان کډوال داسې مهال بېرته خپل هېواد ته ستنېږي چې لا هم میلیونونه افغانان د پاکستان په بېلابېلو ښارونو کې د کډوالۍ شپې او ورځې سبا کوي.
له تېرې یوې اوونۍ راهیسې پاکستان کې د یاد هېواد د مخکیني لومړي وزیر عمران د نیولو په غبرګون کې پراخ لاریونونه شوي او لا هم وضعیت کړکېجن دی.
ګڼشمېر افغان کډوالو له سلاموطندار سره په خبرو کې له یاد وضعیت د اندېښنې په څرګندولو سره ویلي و چې یوه نامعلوم برخلیک سره مخ دي.
