باختر دولتي اژانس د افغانستان بانک د یوې سرچینې له قوله لیکلي چې د تازه چاپ شویو افغانیو لومړنۍ الوتکه نن د کابل هوايي ډګر ته را رسېدلې ده.
دغې سرچینې باختر ته د را رسېدلیو افغانیو شمېر نهدی ښودلی. د راپورونو پر بنسټ، دا پیسې په پولنډ کې چاپ شوې دي.
د افغانستان بانک د روان کال د تلې میاشتې په دېرشمه ویلي و چې د افغانیو چاپېدو په برخه کې یې څهناڅه پرمختګ کړی او ډېر ژر به نوې افغانۍ کابل ته را ولېږدول شي.
د افغانستان بانک په یوه خبرپاڼه کې لیکلي و چې نوې افغانۍ به د معقولو پولي سیاستونو پر بنسټ او له اړتیا سره سم بازار ته راوباسي او مندرس شوې زړې افغانۍ به ورو ورو له بازاره ټولې کړي.
د سلاموطندار پښتو فېسبوکپاڼه وڅارئ
د یادونې ده چې اوس هېواد کې مندرسې پیسې ډېرې شوي او ان په بانکونو کې وېشل کېږي چې خلک او د بانکونو مسوولانو ته پر یوه سرخوږي بدلې شوې دي.