د افغانستان لپاره د اروپايي ټولنې سفیر وان برانټ د افغان شخصیتونو سره د اړیکې او بېرته راستنېدو کمېسیون د جوړېدو په تړاو د اسلامي امارت له پرېکړې هرکلی کړی دی.
برانټ نن پنجشنبه سهار پر خپل ټویټرپاڼه لیکلي، که چېرته د اسلامي امارت دغه پرېکړه رښتیا وي، نو دا به د راتلونکي ټولګډونه حکومت د رسمیت پېژندنې پر لور لار اسانه کړي.
د سلاموطندار پښتو فېسبوکپاڼه وڅارئ
د اسلامي امارت د کابینې په پرونۍ ناسته کې له افغانستان څخه بهر ته د تللو شخصیتونو د بېرته راوستلو په موخه د افغان شخصیتونو سره د اړیکې او بېرته راستنېدو کمېسیون د جوړېدو طرحه تصویب کړه.
په دغه ناسته کې پرېکړه وشوه چې یاد کمېسیون به د شهابالدین دلاور په مشري له هېواد څخه د وتلو شخصیتونو په بېرته راستنولو کې مرسته کوي.
تراوسه د دغه کمېسیون د فعالیتونو په اړه معلومات نه دي ورکړل شوي. د اسلامي امارت له بیا راتګ سره هممهاله د مخکیني حکومت ګڼشمېر لوړپوړي چارواکي او افغان شخصیتونه له هېواد څخه وتښتېدل.
له دې وړاندې د اسلامي امارت چارواکو په وار وار د مخکیني حکومت له چارواکو څخه غوښتنه کړې چې بېرته خپل هېواد ته راشي.
