د جګړې د ګردونو او د وسلو د باروتو په منځ کې د جوزجان د ولسوالیو پر لور روان وم. کوچني ماشومان له جګړې پاتې او ویجاړو دېوالونو ترمنځ د خپلو پلرونو راتلو ته شېبې شمېرې او د هغو د لیدو لپاره په هر موټر پسې منډې وهي.
د ماشومانو لوڅې پښې او مایوسې څېرې او خپلو ځامنو ته په تمه میندې د هر انسان زړه ټوټه ټوټه کوي. زه هغو کورونو ته ورغلم چې جګړې یې له ماشومانو د پلار مینه او له میندو هم د خبرو کولو وسه اخیستې ده.
په هرات کې د ملکي وګړو د ساتنې کاري ډلې له لوري خپرې شوې شمېرې ښيي چې د روان لمریز کال په لیندۍ او مرغومي میاشتو کې د دولت او طالبانو ترمنځ په مخامخ نښتو کې ۲۴ ملکي وګړي وژل شوي او ۵۱ نور ټپیان دي.
د دغو شمېرو له مخې، په داسې حال کې چې د همدغه کال په تلې او لړم میاشتو کې د نښتو پر مهال یوازې ۱۰ ملکیان وژل شوي وو.
په دوحه کې د حکومت د مرکچي پلاوي غړي عبدالحفیظ منصور سلاموطندار ته ویلي چې د طالبانو له مرکچي پلاوي یې غوښتي چې تر اجندا وړاندې د دواړو لوریو دیني عالمان دې د قرآن او حدیثو په رڼا کې د جګړې پر مشروعیت او نه مشروعیت د رسنیو په مخ کې بحث وکړي.
هغه وايي، که دواړه لوري یوې پایلې ته ورسېږي؛ نو بیا به د اجندا په ټاکلو کې ډېرې ستونزې لرې شي، خو په وینا یې، طالبانو تر اوسه دغه وړاندیز نهدی منلی.
طالبانو له افغانستانه د شاوخوا دوو زرو امریکايي سرتېرو د وتلو له اعلان څو ساعته وروسته په کندهار کې د ځانګړې قطعې پر کنډک موټربم برید وکړ. په همدې حال کې د طالبانو نفوذي کسانو بېګاه د هرات په غوریان ولسوالي کې پر ولسي پاڅونوالو برید کړی چې له کبله یې ۱۲ پاڅونوال وژل شوي دي. په بلخ کې بیا ۸ طالبان وژل شوي او ۱۱ ټپیان دي.
د بدخشان امنیتي مسوولان وايي چې د دغه ولایت د ولایتي شورا یوه پخواني غړي او په ارګو ولسوالي کې د ولسي پاڅونوالو د یوه قوماندان ترمنځ نښته کې دوه کسان وژل شوي دي.
د تخار امنیتي مسوولان او ولسي سرچینې مني چې د دغه ولایت د درقد ولسوالي د یوه ټولي قوماندان له خپلو څلورو سرتېرو سره وژل شوی دی.
ولسمشر محمداشرف غني نن سهار د یوه لوړپوړي دولتي پلاوي په مشري ننګرهار ولایت ته سفر وکړ.
ولسمشر د دغه سفر پر مهال په یوه لویه ولسي غونډه کې د ګډون تر څنګ، د ننګرهار له چارواکو او د ټولنې له بېلابېلو اړخونو سره لیده کاته وکړل او د هغوی ستونزې یې واورېدلې.
بېوزلي، وزګارتیا او لوږې چې د جګړې د دوام له کبله یې په غور کې پر خلکو سیوری غوړولی، په دغه ولایت کې پر خوارځواکي د ماشومانو د اخته کېدو لامل شوي دي. یوشمېر کورنۍ چې ماشومان یې پر خوارځواکي اخته دي وايي، ډېرې شپې په وږې خېټه ویده کېږي.
په بغلان کې امنیتي مسوولان وايي چې د دغه ولایت په مرکز پلخمري ښار کې پر یوې پوستې د طالبانو برید کې یو قوماندان او دوه سرتېري وژل شوي دي.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
