سویډن کې د «قران کریم» سوځولو په غبرګون کې سرپرست حکومت افغانستان کې د دغه هېواد اړوند ټولو بنسټونو فعالیتونه ځنډولي دي.
د ا.ا ویاند ذبېحالله مجاهد پر خپله ټوېټرپاڼه لیکلي: «وروسته له هغې چې په سویډن کې د الله نجات بښوونکي کتاب قران کریم ته سپکاوی وشو او د مسلمانانو د عقیدې د توهین اجازه ورکړل شوه، تر څو چې د دې شوم عمل له امله له مسلمانانو بښنه نه وي غوښتل شوي، ا.ا افغانستان کې د سویډن د هر ډول فعالیت د بندېدو امر کوي.»
د سلاموطندار پښتو فېسبوکپاڼه وڅارئ
د سرپرست حکومت له لوري په خپره شوې خبرپاڼه کې د نړۍ له نورو مسلمانو هېوادونو هم غوښتنه شوې چې له سویډن سره پر خپلو اړیکو او تعامل بیا کتنه وکړي.
د راپورونو له مخې، د روان کال د جنورۍ میاشت کې ښي اړخي سیاستوال راسموس پالودان چې د سویډن او ډنمارک تابعیت لري، دوه ځلې د قرانکریم نسخې سوځولې دي.
خو په وروستي ځل د روان کال د چنګاښ پر اتمه د لوی اختر لمانځه پر مهال یوه عراقي کس چې د سویډن تابعیت لري، د سویډن مرکزي جومات مخکې ته د قران کریم یوه نسخه وسوځوله چې ګڼشمېر غبرکونونه یې راوپارول.
له دې پېښې وروسته د افغانستان په ګډون ګڼشمېر مسلمانو هېوادونو دغه پرېکړه په کلکو ټکو وغندله او پر سویډن یې غږ وکړ چې د دې کار مخه ونیسي.
هغه مهال د بهرنیو چارو وزارت پر خپله ټوېټرپاڼه لیکلي و چې دغه کړنه د اسلام دین او نږدې دوه میلیارډ مسلمانانو ته سپکاوی دی.
د یاد وزارت ویاند عبدالقهار بلخي پر خپله ټوېټرپاڼه لیکلي و چې ا.ا د سویډن حکومت له لوري د بیان ازادۍ په پلمه یاد کس ته د قران سوځولو د اجازې ورکړې ترڅنګ د نوموړي د امنیت ټینګښت کړنه هم په کلکو ټکو غندي.
د سویډن حکومت هم له دې امله نیوکې کېږي چې ولې دغه هېواد کې د قرانکریم سوځولو ته اجازه ورکوي او د هغه کس امنیت هم نیسي چې دا کړنه کوي.