قطر کې د سرپرست حکومت د سیاسي دفتر مشر سهیل شاهین وايي، د ځمکو د غصب مخنیوي او د ځمکو د استرداد کمېسیون د افغان هندوانو او سېکانو د غصب شویو شتمنیو د خلاصون بهیر پیل کړی.
یاد کمېسیون د عدلیې وزارت له لوري جوړ شوی او په هېواد کې د ځمکو د غصب مخنیوي اړوند چارې مخته وړي.
د سلاموطندار پښتو فېسبوکپاڼه وڅارئ
سهیل شاهین له یوې هندۍ رسنۍ سره په مرکه کې ویلي، دغه کمېسیون به هندوانو او سیکانو ته د دوی ټولې هغه شتمنۍ بېرته وسپاري چې د تېر حکومت پر مهال غصب شوي دي.
د افغانستان په ډېری ولایتونو کې افغان سېکان او هندوان ژوند کوي چې د تېرو کلونو پرمهال یې شتمني او ځمکې غصب او لوټل شوي دي.
د سرپرست حکومت په راتلو سره ګڼشمېر افغان سېکان او هندوان هند ته کډوال شوي او یوازې د ګوتو په شمېر کسان پلازمېنه او ځینو ولایتونو کې ژوند کوي.
په ورته مهال سهیل شاهین د مرکه کې هېواد ته د افغان سیکانو د یوه مشر نریندرا سینګ خالصه بېرته ستنېدل مهم ګڼلي او په وینا یې، هغه له افغان شخیصتونو سره د تماس کمېسیون په هلوځلو هېواد ته ستون شوی دی.
نرېندرا خالصه د جمهوري حکومت پر مهال د ولسي جرګې غړی و او د سرپرست حکومت په واکمنېدو سره کاناډا ته کډوال شوی و.